Ketua Pelaksana program Kampung Nelayan Merah Putih (KNMP) Trian Yunanda ngandharake, program sing kalebu prioritase Prabowo Subianto mau bakal menehi dhampak positip marang nelayan pesisir. Dhampak positip iku arupa undhake karaharjan lan sansaya kuwate ketahanan pangan berkelanjutan. Kementerian Kelautan dan Perikanan (KKP), kandhane Trian, wis mbiwarakake 65 lokasi pembangunan tahap kapisan program KNMP.
Saka 65 lokasi kuwi, kandhane Trian, loro ing antarane dumunung ana Propinsi Bengkulu, yakuwi Desa Penago I, Kabupaten Seluma; lan Desa Merpas, Kabupaten Kaur. Trian kandha wis ngecek lokasi loro iku kanggo mesthekake kesiapane masyarakat, dhukungane pamarentah daerah, lan katerusane program. “Program iki mujudake upaya konkrite pamarentah majokake wilayah pesisir Indonesia,” tuture Trian sing uga staf ahli Kementerian KKP, Kemis, 2 Oktober 2025.
Bupati Seluma Teddy Rahman nedha nrima marang upayane pamarentah pusat ngleksanani KNMP ing daerahe. Kanthi dhukungan fasilitas infrastruktur sing cukup, Teddy optimis KNMP mujudake modhel pengembangan kampung nelayan kang ramah lingkungan. Implementasi KNMP ing Desa Penago I kanthi alokasi anggaran Rp 20,6 miliar, diajab sansaya ngundhakake prodhuksi perikanan, saengga mawujud dadi sentra industri perikanan anyar ing Seluma. Menteri KKP Sakti Wahyu Tranggono mratelakake pambangunane 65 KNMP ditindakake satahap mbaka satahap. Taun iki KKP narget mbangun 100 kampung nelayan kanthi tahap I cacah 65 dhisik. Proyeksi mau wis katetepake lumantar KP No. 55/2025. “KNMP ngudi ngundhakake prodhuktivitase nalayan kanthi luwih modern saengga duwe daya saing,” ujare Sakti. (Antara)
Panulis : Antara
Edhitor : Tim Redhaksi Panjebar Semangat Digital
