Bupati Situbondo, Jawa Timur, Yusuf Rio Wahyu Prayogo njanjeni modhal Rp 100 juta tumrap desa sing wani miwiti nggerakake Koperasi Desa/Koperasi Kelurahan (Kopdes/Kopkel) Merah Putih. Miturut Yusuf suntikan modhal kasebut kanggo njurung desa-desa sing sumebar ana 17 kecamatan amrih gumregah adeg kopdes kanggo ngundhakake karaharjane masyarakat. “Desa sing bisa ngoperasekake koperasi nganti Desember, dakwenehi Rp 100 juta,” kandhane bupati sing akrab diundang Mas Rio iki, Selasa, 7 Oktober 2025.
Rio ngandharake, akeh bidhang usaha sing bisa dikelola dening kopdes/kopkel, wiwit sektor pariwisata, perkebunan, pertanian, usaha mikro kecil menengah (UMKM), cundhuk karo potensi sing diduweni saben-saben desa. Dheweke menehi conto Pantai Dubibir ing Desa Ketah, Kecamatan Suboh, sing bisa dikelola sarta dipoles luwih endah maneh.
Asil pengelolaan obyek wisata mau ndayani njenggeleke ekonomi desa jalaran kejaba entuk retribusi saka tiket mlebu kawasan wisata, UMKM kecipratan rejeki saka anggone dodolan suvenir lan panganan. Miturut dheweke, entrepreneur kudu ngawiti dadi penggerak koperasi. Ora perlu nunggu modhal saka Kopdes Merah Putih pusat sing dadi program prioritase Presiden Prabowo Subianto.
“Aku darbe panemu, sawenehe etrepreneur, sawenehe penggerak koperasi, aja ngenteni mudhune modhal. Dheweke kudu nyiptakake modhal dhewe. Lakokna dhisik bisnise, senadyan cilik sing penting mlaku,” tuture Rio. Idheale, ujare Rio, sawijining desa wis kulina nglakokake koperasi cilik-cilikan sadurunge ngoperasekake Kopdes Merah Putih sing luwih gedhe. Kopdes Merah Putih diajab ora madeg dhewe, nanging bisa kolaborasi karo program-programe pamarentah liyane, kaya dene Makan Bergizi Gratis (MBG), supaya bahan-bahan pangan sing didol koperasi entuk penyaluran. “Persepsine kudu dipadhakake dhisik, arep bisnis apa. Apa potensi desa sing pantes diangkat, lan liya-liyane,” ujare. (Antara)
Panulis : Antara
Edhitor : Tim Redhaksi Panjebar Semangat Digital
