Menteri Kebudayaan Fadli Zon darbe panemu, pangan ora mung saderma kebutuhan fisik, nanging uga pengilon tumrap budaya lan jati dhiri bangsa. Bab kuwi diandharake Fadli samarine ngestreni kegiyatan Kenduri Budaya Pangan Lokal Nusantara ing Museum Nasional Indonesia, Jakarta, 13-19 Oktober 2025.
“Pangan lokal kang kita duweni mujudake warisan budaya, pengilon tumrap idhentitas, tradhisi, kearifan lokal lan jati dhiri bangsa. Saben dhaerah nduweni sistem budaya pangan lokal sing kabentuk lumantar interaksi kang dawa antarane manungsa, alam, lan kapercayane leluhur,” tuture Fadli, Selasa, 14 Oktober 2025.
Miturut Fadli, Kenduri Budaya Pangan Lokal Nusantara dianakake minangka wujud rasa syukur marang sikep memitran sing tansah diperdi dening masyarakat lokal dhaerah-dhaerah ing wilayah Indonesia. Acara Kenduri Budaya Pangan, kandhane Fadli, bisa dadi kaca benggala kekuwatan nilai budaya sarta ngukuhi akrabe memitran, ngreksa lestarine pangan lokal, sarta njamin kesehatane generasi bangsa sateruse.
Presiden Prabowo, ujare Fadli, mapanake isu pangan minangka salah sijine prioritas pembangunan nasional, yaiku lumantar swasembada pangan lan Makan Bergizi Gratis (MBG) kanggo nggayuh generasi emas 2045. Kementerian Kebudayaan nyengkuyung program pangan kasebut liwat Gerakan Pangan Lokal Nusantara. “Kanthi nglestarekake pangan lokal, kita ora mung ngukuhi warisane leluhur, nanging uga mikuwati kedaulatan lan ketahanan pangan nasional ing satengahe tantangan global, utamane owah-owahan iklim lan gumantung marang impor,” tuture Fadli Zon. (Antara)
Panulis : Antara
Edhitor : Tim Redhaksi Panjebar Semangat Digital
