Menteri Sosial Saifullah Yusuf mratelakake, wiwit taun 2026 mengko 36.000 penyandhang disabilitas bakal antuk jatah makan bergizi gratis (MBG) kaping pindho jrone sedina, yaiku esuk lan sore. MBG kanggo klompok disabilitas, miturut Saifullah, diterake menyang omah langsung dening kadher-kadher desa sing diimpun pemerintah.
“Sing ngeterake jatah MBG mengko klompok masyarakat. Kementerian Sosial mapanake kadhar-kadher ing saben desa,” kandhane Saifullah sabubare ngestreni pengetan ‘Hari Disabilitas Internasional 2025’ ing Jakarta, Senen, 7 Desember 2025. Tema kang diangkat jrone pengetan mau yakuwi ‘Meneguhkan Peran Disabilitas Internasional dalam Pembangunan Berkelanjutan.’
Saifullah nambahake, kadher-kadher kuwi tugase ora mung saderma ngeterake jatah MBG, nanging uga ngladeni keperluwane penyandhang disabilitas. Upamane aweh kawigaten, ngupakara, lan perduli.
Sejene marang penyandhang disabilitas, Kemensos uga bakal ngimpun kadher sing mligi ngladeni bot repote lansia sing urip dhewe. Tugase padha karo kadher penyandhang disabilitas, yaiku ngeterake jatah MBG esuk lan sore, sarta ngopeni lansia kasebut kanthi kawigaten sing gedhe. “Kanggo klompok lansia, sauntara ana 100.000 sing entuk jatah MBG. Mbokmenawa mengkone bisa tambah maneh cacahe,” tuture Saifullah.Miturut Saifullah, jumbuh karo Instruksi Presiden No. 4 Taun 2025 ngenani Data Tunggal Sosial Ekonomi Nasional kang nyakup data-datane penyandhang disabilitas, klebu nyukupi kebutuhan gizi lumantar MBG. “Yen data-data mau valid, Pak Presiden Prabowo yakin program-program sing wis dirancang bakal pas menyang sasarane,” ujare Saifullah. (Antara)
Panulis : Antara
Edhitor : Tim Redhaksi Panjebar Semangat Digital
