Wakil Menteri Koperasi (Wamenkop) Farida Farichah ngandharake kabentukan Koperasi Desa/Kelurahan (Kopdes/Kopkel) Merah Putih kang dadi program unggulane Presiden Prabowo Subianto dudu ancaman tumrap pelaku usaha ekonomi lokal, kaya dene warung mangan, toko kelonthong apadene Badan Usaha Milik Desa (BUMDes).
“Kosok baline, kopdes/kopkel iki diajab bisa-a dadi mitrane pelaku ekonomi lokal kanggo sansaya nguwatake potensi ekonomi desa, klebu prodhuk lokal lan asil pertanian lokal,” kandhane Farida jrone kegiyatan ‘Forum Tematik Pengawasan Kopdes Merah Putih Berbasis Partisipasi Anggota dan Masyarakat’ ing Denpasar, Bali, Jumuah, 12 Desember 2025.
Miturut Farida, pangelolane Kopdes Merah Putih asipat dhemokratis. Yaiku saka anggota kanggo anggota. Kanthi sistem kang mengkono mau kabeh anggota nduweni hak sarta kuwajiban sing padha. Bab kuwi beda karo BUMDes kang dicekel dening kepala desa dalah perangkate saengga masyarakat kurang duwe peran aktif.
Mula Farida ngelikake amrih pengurus Kopdes Merah Putih nyingkiri sipat-sipat ekslusif (tertutup). Tujuwane supaya warga desa ketarik kanggo nggamblok dadi anggotane. “Suksese program Kopdes Merah Putih ora mung gumantung marang pemerintah, nanging mbutuhake peran aktif kabeh elemen masyarakat desa lan kelurahan,” kandhane Farida.(Antara)
Panulis : Antara
Edhitor : Tim Redhaksi Panjebar Semangat Digital
