Menteri Kesehatan Budi Gunadi Sadikin mesthekake program Cek Kesehatan Gratis (CKG) bakal dileksanani nganti dhaerah-dhaerah kapencil. Miturut Budi pamarentah ora kangelan nggayuh plosok-plosok pradesan jalaran nduweni 10.000 puskesmas kang sumebar tekan kecamatan lan kelurahan. “Ora ana masalah,” ujare Budi nalika menehi kuliah umum Pembukaan Pengenalan Kehidupan Kampus bagi Mahasiswa Baru (PKKMB) ing Universitas Negeri Padang, Sumatera Barat, Senen, 11 Agustus 2025.
Budi menehi conto, mligi tanah Minang, program CKG dileksanani nganti wilayah paling njaba, kaya dene Kabupaten Kepulauan Mentawai kang winatesan karo Samudra Hindia. Miturut Budi pamarentah narget 52 juta pasarta didik melu ngrasakake salah siji program unggulane Presiden Prabowo kuwi.
Tujuwan narget 52 juta pasarta didik mau supaya aspek layanan dhasar kang arupa layanan kesehatan bisa dicukupi nganti tataran sekolah. “Targetku sajrone limang taun pamarentahan iki 52 juta pelajar entuk layanan CKG,” ucape Budi. Program CKG dirancang kanggo jutaan bocah Indonesia ing 288 ewu satuan pendidikan, wiwit SD nganti SMA. Menteri Koordinator Pembangunan Manusia dan Kebudayaan Pratikno ngandharake CKG kanggo murid sekolah mujudake pambudidaya mbangun pondhasi bangsa, yaiku sumber daya manungsa sing unggul, dislarasake karo MBG, revitalisasi sekolahan, lan digitalisasi pasinaon. (Antara)
Panulis : Antara
Edhitor : Tim Redhaksi Panjebar Semangat Digital
