Pamarentah wekasan mutusake mbentuk Kementerian Haji dan Umrah. Keputusan kuwi dijupuk jrone Rapat Paripurna kaping-4 Masa Sidang I Tahun Sidang 2025-2026 DPR. Maune urusan kaji lan umrah diputusi dadi tanggung jawabe Badan Penyelenggara (BP) Haji. Nanging durung wae BP Haji ngleksanani tugase taun 2026, kaselak diunggahake drajate dadi kementerian.
Undhake BP Haji dadi kementerian, diwawas minangka keseriusane pamarentah mikuwati tata kelola ibadah kaji. Kadidene negara kanthi jumlah calon kaji paling gedhe sadonya saben taune, Indonesia ngadhepi tantangan ora entheng magepokan karo administrasi, logistik, pembinaan, kesehatan, sarta akomodasi. Kerumitane masalah-masalah kasebut butuh kawigaten mirunggan.
Miturut pamarentah, dibentuke Kementerian Haji dan Umrah darbe ancas mrasajakake birokrasi, mesisan mikuwati koordinasi lintas sektor. Sasuwene 75 taun dikemonah dening Dirjen Penyelenggaraan Haji dan Umrah Kementerian Agama, ibadah haji durung duwe bebadan mligi. Kanthi anane kementerian khusus kaji, diajab ora ana maneh masalah-masalah kang timbul sasuwene proses ngibadah haji sarta umrah. Upamane panganan telat dikirim, kuwalitas penginepan ala, transportasi ora enggal teka lan sapanunggalane.
Mula Kementerian Haji dan Umrah mengkone kang tanggung jawab nyukupi sakabehe tahapan ibadah, wiwit pendhaptaran, pelatihan manasik, ngurus visa, akomodhasi, nganti ngawasi jemaah sing pinuju ana Arab Saudi. Ing babagan umrah, kementerian iki uga bakal nyeleksi biro travel sing kena dipercaya. Pamerentah Indonesia kepengin Kementerian Haji dan Umrah dadi minangka mitra aktif-e pamarentah Arab Saudi kanggo mikuwati layanan ibadah.
Nadyan akeh sing ngapresiasi karo kabentuke Kementerian Haji dan Umrah, nanging proses peralihan admistrasine saka Kementerian Agama ora segampang mlumah murebake epek-epek tangan. Kadidene lembaga anyar, Kementerian Haji butuh pegawai sing mumpuni ing bidhange. BP Haji pancen wis nduweni struktur kepengurusan nganti dhaerah. Nanging owah-owahan saka ‘badan’ dadi ‘kementerian’ perlu keselarasan lan rancangan mateng.
Nadhlatul Ulama lan Muhammadiyah, organisasi kemasyarakatan Islam kanthi anggota paling gedhe sa-Indonesia, nyengkuyung lekase pamarentah mbentuk Kementerian Haji lan Umrah. Miturut ormas kekarone, Kementerian Haji lan Umrah ora saderma nambah-nambahi lembaga negara, nanging pamarentah kepengin luwih serius jrone ngurusi bab rukun Islam kaping lima iku wiwit A nganti Z amrih ora timbul masalah-masalah sing tundhone mitunani jemaah.
Akeh sing pitakon, apa tugase Kementerian Agama (Kemenag) sawise ora cawe-cawe prekara ibadah haji? Mangka wis 75 taun lawase kementerian kuwi ajeg ngurusi ibadahe umat Islam mau. Sejatine tugase Kementerian Agama isih akeh, utamane bab keumatan sarta pendidikan agama. Menteri Agama Nasaruddin Umar ngandharake peralihan urusan ibadah haji mau nggawa hikmah, awit saiki instansi kang dipimpin mau bisa luwih konsentrasi marang layanan keumatan.
Ing babagan keagamaan, ana maneka direktorat sing dadi tanggung jawabe Kemenag mbina umat, yaiku Bimbingan Masyarakat (Bimas) Islam, Bimas Kristen, Bimas Katolik, Bimas Hindu, Bimas Budha, Konghucu, kang nduwebi sub-garapan kang jembar. Ing pendidikan Islam upamane, Kemenag ngurusi wiwit pendidikan formal tingkat madrasah, nganti perguruan tinggi keagamaan. Kemenag uga isih ngurusi pendidikan nonformal diniyah sarta pondhok pesantren. Mengkono uga sing ditindakake Kemenag marang agama-agama saliyane Islam.
Ewasemono sethithik akeh Kemenag sacara ora langsung isih duwe tugas gegandhengan karo Kementerian Haji nyuksesake ibadah mau. Jer masyarakat sing duwe niyat budhal kaji, mengkone uga isih duwe urusan karo Kemenag ing bab pengurusan dhokumen data dhiri. Pambentuke Kementerian Haji dan Umrah dadi tunggak sejarah wigati lumakune pengelolaan ibadah Islam. Kementerian mau bisa dadi simbol tekane negara ing saben tahapan ibadah satengahe masyarakat. (Antara/Asep Firmansyah)
Panulis : Antara
Edhitor : Tim Redhaksi Panjebar Semangat Digital
