Koperasi Desa (Kopdes) Sidomulyo, Kabupaten Jember, Jawa Timur ngekspor kopi menyang Brunei Darussalam, Singapura lan Hong Kong. “Saka sawijine desa ing ereng-erenge Gunung Gumitir, Kopdes Sidomulyo bisa ekspor perdhana prodhuk kopi menyang telung negara,” kandhane Kepala Desa Sidomulyo Kamiluddin, Minggu, 31 Agustus 2025.
Miturut Kamiluddin ekspor kopi sepisanan iku difasilitasi dening Export Center Surabaya sing mujudake bageyan saka Kementerian Perdagangan. Ekspor kopi Sidomulyo, kandhane Kamiluddin, nuduhake menawa prodhuk tanduran desa kuwawa sesaingan ana pasar internasional. Tumrap Kamiluddin, ekspor kopi mau ora sekadhar transaksi dagang, nanging ngenani rasa percaya menawa desa sanggup ngurusi koperasi kanthi profesional, transparan, lan duwe orientasi global.
Kopdes Sidomulyo siji saka wolung Kopdes Merah Putih kang didadekake percontohan dening Kementerian Koperasi dan UKM lumantar Lembaga Pengelola Dana Bergulir (LPDB). Kopdes Sidomulyo duwe unit usaha wajib cacah nem, yaiku klinik, apotek, logistik, simpan pinjam, sembako, lan pergudhangan kopi. Saka sakehing unit usaha kuwi komoditas kopi dadi andelane Kopdes Sidomulyo awit mutune ora kalah karo mancanegara.
Ekspor sepisanan iku ditandhani kanthi rerangkening kegiyatan, antara liya pelatihan percepatan ekspor, kurasi prodhuk, gelar prodhuk ekspor, lan temu bisnis karo konsumen. Perwakilan konsumen sing komunikasi sacara virtual yaiku Pangiran Sirajuddin Adirrahman saka Brunei, Wulan saka Hong Kong, lan Eka Mardjiati saka Singapura. Kamiluddin bombong kegiyatan iku keconggah ngasilake tandha tangan Letter of Intent (LoI) 78.000 dollar AS. Saka gunggung semono mau 30.000 dollar AS saka Brunei, 23.000 dollar AS saka Singapura, lan 25.000 dollar AS saka Singapura. (Antara)
