Kementerian Ketenagakerjaan (Kemenaker) narget 80 ewu lulusan anyar perguruan tinggi (fresh graduate) melu program magang nasional angkatan (batch) periodhe kapindho. Menteri Ketenagakerjaan Yassierli ngandharake, target mau salaras karo arahane Presiden Prabowo Subianto kang ngepengini saora-orane ana 100 ewu fresh graduate bisa melu program sing ana gegayutane karo paket stimulus ekonomi nasional kuwi.
“Batch periodhe kapisan kita bukak program magang kanggo 20 ewu fresh graduate. Yen 20 ewu wis kaleksanan, kita bukak maneh periodhe kapindo kanggo 80 pasarta. November iki insya-Allah kaleksanan,” ujare Yassierly, Senen, 13 Oktober 2025.
Sekretaris Kabinet Teddy Indra Wijaya nuturake, program magang nasional mengku karep menehi kalodhangan marang lulusan anyar pawiyatan luhur oleh pengalaman kerja, mesisan nyengkuyung panambahe tenaga kerja sektor industri. Pasarta magang digaji standhar UMK ing papan penempatane sowang-sowang. Ing batch kapindho iki Kemenaker mbudidaya mapanake pasarta magang ing kantor kementerian, lembaga, badan pamarentah pusat/daerah sa-Indonesia, kejaba uga ing industri-industri gedhe. Kanthi dimagangake, pamarentah ngajab fresh graduate mau disumurupi etos kerjane saengga narik kawigatene panggonan sing dimagangi kanggo ngimpun dadi pegawai/karyawan. (Antara)
Panulis : Antara
Edhitor : Tim Redhaksi Panjebar Semangat Digital
