Kepala Badan Gizi Nasional Dadan Hindayana nemenake program Makan Bergizi Gratis (MBG) tetep dibacutake samarine unjuk rasa gedhe kelakon ing Jakarta 28-31 Agustus 2025. Tumrap sekolah-sekolah sing nindakake sinau jarak adoh (daring) sasuwene diliburake 1-4 September 2025, mekanisme penyalurane MBG tetep liwat sekolah-sekolah. Mengkone siswa njupuk bekal MBG iku langsung menyang sekolahane dhewe-dhewe. “Nanging yen murid ora kepengin njupuk bekal mau, distribusi MBG diliburake,” ujare Dadan.
Ing bageyan liya, Dadan kandha bakal nitipriksa ompreng wadhah MBG sing disebut-sebut ngandhut lenga babi. Miturut Dandan bahane ompreng kuwi diimpor saka Chaoshan, Cina. “Kita lagi niti priksa, check and recheck, bener orane kabar kuwi. Merga prodhuk ompreng kuwi rak wis digunakake sasuwene program MBG iki,” kandhane Dandan, Minggu, 31 Agustus 2025.
Panlusuran kandhungan lenga babi mau ditindakake BGN bebarengan karo Kementerian Perdagangan, Kementerian Perindustrian, sarta Badan Pengawas Obat dan Makanan (BPOM). Miturut Dadan pengadaan ompreng kuwi ditindakake dening mitra MBG. Badan Gizi Nasional dhewe, ujare Dadan, durung tumindak apa-apa. “Mulane kabeh lagi dicek,” tuture.Sadurunge iki ana unggahan media sosial dening Indonesia Business Post sing nglapurake temon 30-40 pabrik ompreng panganan kanggo pasar global, klebu sing digunakake ana Indonesia. Ing kono tinemu cap “Made in Indonesia” dijangkepi simbul SNI. Prodhuk iku dinuga palsu awit bahan baku ompreng dijupuk saka Cina. Panggunane ompreng tipe 201 uga dianggep ora cocog kanggo wadhah MBG awit ngandhut logam mangan (logam awarna putih semu klawu). (Antara)
Panulis : Antara
Edhitor : Tim Redhaksi Panjebar Semangat Digital
