Menteri Pendidikan Dasar dan Menangah (Mendikdasmen) Abdul Mu’ti mratelakake, program tes kemampuan akademik (TKA) tetep dileksanani tanggal 3-9 November 2025 iki senadyan ana panulakan saka pihak sing ora sarujuk lumantar penggalangan tandha tangan petisi. Miturut Mu’ti Presiden Prabowo Subianto wis nyetujoni program kasebut.
“The show must go on jalaran program iki wis disetujoni Presiden. Yen ana sing ora siap, ya ora usah melu merga program iki sipate sukarela,” kandhane Mu’ti ing Jakarta, Selasa, 28 Oktober 2025.
TKA mujudake instrumen penilaian standar sing dirancang kanggo ngukur potensi akademik-e murid marang mata pelajaran tinamtu, sarta kanggo menehi validasi biji rapot kanthi obyektif. Miturut Mu’ti program mau sipate ora wajib, murid kena melu lan ora. Sing jelas, ujare Mu’ti, Kemendikdasmen wis nindakake sosialisasi program kuwi menyang sekolah-sekolah lan dipahami. Mu’ti ngurmati marang pihak-pihak sing ora setuju. Nanging kabeh sing arep melu TKA wis ngerti konsekuensine. Miturut Mu’ti wis luwih saka 3,5 juta siswa sing dhaptar melu TKA. Saengga petisi panulakan sing nganti tanggal 28 Oktober 2025 ditandhatangani dening wong 184 ewu mau ora murungake rancangan TKA. (Antara)
Panulis : Antara
Edhitor : Tim Redhaksi Panjebar Semangat Digital
