Menteri Keuangan (Menkeu) Purbaya Yudi Sadewa mesthekake kompleks kawasan inti Ibu Kota Nusantara (IKN), Kalimantan Timur ora bakal dadi ‘kutha dhemit.’ Sebab, proses pembangunan ing kana terus lumaku. Yen perekonomian Indonesia saya becik, otomatis dhuwite negara sansaya akeh. “Yen jareku, IKN ora bakal dadi kutha dhemit. Ora perlu wedi, aja dirungokake ramalane medhia luwar negri, wong-wong kuwi kerep salah mredhiksi,” tuture Purbaya samarine nekani rapat kerja bersama Komite IV Dewan Perwakilan Daerah (DPD), Jakarta, Senen, 3 November 2025.
Purbaya nambahake, pemerintah uga wis aweh pasarujukan marang perusahaan-perusahaan properti sing duwe karep mbangun perumahan ana IKN. Proyek pambangunan omah mau, ujare Purbaya, sebageyan wis ditandangi. Sing cetha, kandhane Purbaya, kegiyatan proyek ing kawasan IKN ora leren. Saengga apa sing dadi targete Presiden Prabowo amrih IKN dadi ibu kota politik akhir 2027 bisa kaleksanan.
Sadurunge kuwi sawijine medhia online asal Inggris ngramalake IKN bakal dadi ghost city merga kahanane sepi mamring. Anggota Komisi II DPR Muhammad Khozin njaluk marang Otorita IKN (OIKN) amrih nanggepi kritikane medhia asing kuwi kanthi kerja nyata. Miturut Khozin apa sing ditulis medhia mancanegara kuwi sipate pasemon, dudu ramalan. “Mula kudu dijawab nganggo bukti,” tuture Khozin. Kepala OIKN Basuki Hadimuljono nuturake, pihake wis ngerigake ora kurang saka 20.000 tukang kanggo nyepetake pambangunan IKN. Sawise Presiden Prabowo napak astani Perpres No.79/2025 kang isine netapake IKN minangka ibu kota pemerintahan, proses pambangunan wimbuh dikebut. Samengko sing lagi digarap yaiku gedhung DPR lan kantor Mahkamah Agung (MA) amrih ibu kota pemerintahan anyar mau netepi syarat trias politika, yaiku eksekutif, legislatif lan yudikatif. (Antara)
Panulis : Antara
Edhitor : Tim Redhaksi Panjebar Semangat Digital
