Nasib Ngeres Dhemonstran Agustus

Salah sijine kadakwa kasus kerusuhan dhemonstrasi Agustus 2025 tinggal donya ing njero rumah tahanan. Pihak kulawarga ndheseg marang pulisi amrih ngusut prekara kuwi jalaran matine dianggep ora wajar. Kejaba bobot awake anjlog, kurban uga tau wadul ngalami pasiksan wektu ditahan ana kantor pulisi.

Swara kalimah tahlil gumrenggeng ing terase sekretariat Komisi untuk Orang Hilang dan Korban Tindak Kekerasan (KontraS), Jalan Monginsidi, Surabaya, Senen sore, 5 Janua­ri 2026. Kulawarga, sanak sedulur, mitra karuh lan aktivis nggelar donga ing dina kapitu tinggal donyane Alfarisi bin Riko­sen. Nom-noman lola kelairan Sampang, Medura iku ti­was ana njero Rumah Tahanan Negara Kelas I Surabaya ing Jalan Medaeng (Rutan Medaeng), Sidoarjo, 30 Desember 2025.

Alfarisi dipikut pulisi tanggal 9 September 2025 ing warkop duweke mbakyune, Khosiah, Jalan Dupak Masigit, Kelurahan Jepara, Kecamatan Bubutan, Surabaya. Sedina-dina Alfarisi pancen manggon ana omahe mbakyune mau ngiras sabiyantu dodolan wedang kopi. Biyasane, dheweke jaga warkop wiwit bubar magrib nganti lingsir wengi.

Pulisi nuding Alfarisi nggawa bom molotov jrone aksi unjuk rasa akhir Agustus 2025 ing Surabaya. Puluhan pos pulisi, Markas Polsek Tegalsari lan saperangan Gedung Gra­hadi di­obong massa jroning hera-heru patang dina suwene mau. Na­lika kuwi ontran-ontran ora mung kedadeyan ana Sura­baya, nanging uga njeblug ing kutha-kutha gedhe sa-Indo­nesia. 

Ing nota dakwaan-e jeksa, Alfarisi dinyatakake melu dhe­monstrasi jalaran diajak kanca rakete aran Hamdani. Saba­cute Alfarisi ngubungi kanca-kancane supaya nggamblok. Mi­turut jeksa, sa­durunge budhal unjuk rasa, Hamdani luwih dhisik ngajak Alfarisi sarowang neng­gak omben-omben men­demi. I­num­an keras iku dituku Ham­dani saka sawijine toko ing Jalan Dupak Bangu­sari. 

“Terdakwa uga tuku botol kothong ca­cah papat kanggo gawe bom molotov,” mengkono antara liya unine nota dak­waan.

Sasuwene proses sidhang, Alfarisi di­tahan ana Rutan Medaeng. Kejaba Alfa­risi ana terdakwa cacah 12 maneh sing ditrungku ing kono. Maune kabeh di­klum­pukake dadi sak sel. Nanging sa­banjure dipisah ing blok sing beda-beda. Alfarisi sing sekawit mapan ana Blok C dipindhah menyang Blok B.

“Alfarisi dadi katon sedhih sawise dipisah karo kanca-kancane. Dheweke sing biyasane akeh omong, malih kerep meneng,” tuture Fatkhul Khoir, penga­carane Alfarisi saka KontraS Surabaya.

Khosiah ngandharake, adhi wuragile iku sambat awake lara kabeh saploke ditahan ana Markas Kepolisian Resor Kota Besar Surabaya. Ucapan iku ka­we­tu nalika Khosiah mbezuk menyang kan­tor pulisi kaping pindho. Bareng di­dhedhes-dhedhes, Alfarisi wekasan wa­leh menawa dheweke dipilara penyi­dik.“Mripate disikep kain, dhadha dian­temi nganti semaput. Tilas anteman ing dhadha kiwa isih katon,” ujare Khosiah nirokake pawadulane Alfarisi.

Nalika berkas penyidikan dipasrah­ake marang jeksa penuntut umum, Al­fa­risi dipindhah menyang Rutan Me­daeng akhir September 2025. Miturut Khosiah, nalika disambangi menyang rutan, awake Alfarisi susut akeh, saka sing maune bobot 86 kilogram dadi 40 kilogram.

Khosiah mbenerake menawa adhine sambat ora nyaman sawise dipindhah menyang Blok B. Alfarisi tau njaluk marang petugas rutan amrih dibalekake menyang Blok C. Panjaluk mau bisa wae dituruti, nanging syarate ora gratis. Lire Alfarisi kudu mbayar kanthi pengaji tinamtu yen kepengin ngalih menyang blok sing luwih nyaman. Nganti dheweke tinggal donya, kekarepan pindhah blok mau durung kaleksanan.

Riwayat Lelara?

Kabar tiwase Alfarisi ditampa Kho­siah Selasa esuk, 30 Desember 2025. Kepala Medis Poliklinik Rutan Medaeng dhewe sing nyampekake kabar dhuhkita mau. Miturut kepala medis, Alfarisi ke­jang-kejang sawise salat subuh. Kanca-kanca sa-blok-e age-age nggotong me­nyang poliklinik, nanging nyawane ora ketulungan. “Jam 05.30 adhiku dinya­takake tinggal donya,” ujare Khosiah.

Khosiah lan bojone gegancangan menyang Rutan Medaeng saperlu ngu­rus jisime adhine mau. Satekane rutan, Khosiah ngaku disodhori ‘surat pernya­taan’ sing wose ora arep nuntut apa-apa merga tiwase Alfarisi. Sarehne pikirane lagi bruwet, Khosiah terus neken ngono wae surat pernyataan mau tanpa mikir dawa.

Dina kuwi uga layone Alfarisi diku­bur. Nanging nganti seprene isih ana sing ngganjel ing atine Khosiah. Sasu­wene iki Alfarisi sehat, ora duwe riwayat penyakit apa-apa. Mula dheweke gumun nalika kepala poliklinik rutan ngan­dhar­ake menawa Alfarisi kober kejang sadurunge tinggal donya. “Kawit cilik adhiku ora tau lara,” ujare Khosiah.

Khosiah wimbuh kebak tandha pi­takon merga Minggu, 28 Desember 2025, Alfarisi isih kober nilpun. Swarane uga biyasa-biyasa wae, ora nuduhake yen lagi ngampet lara. “Dheweke njaluk kon ngirimi dhuwit Rp 70 ewu, embuh kanggo apa,” kandhane Khosiah.

Fatkhul Khoir nambahake, adhe­dhasar paseksene salah sijine penghuni Blok B, tanggal 30 Desember wanci su­buh Alfarisi isih angler turu. Kancane mau banjur gugah-gugah merga adzan subuh keprungu ngumandhang. Nalika diajak salat menyang musala rutan, Alfarisi mangsuli, “Dhisika kana, engko taksusul!”

Bali saka musala, kancane mau me­ruhi Alfarisi isih glethakan ing jrambah. Kancane banjur nyusul ngglethak ngan­ti wusanane keturon. Dheweke gragab­an tangi nalika krungu Alfarisi ngorok lan kejang.

Fatkhul cuwa merga pihak rutan ora cag-ceg aweh pitu­lungan. Dheweke yakin saben blok diawasi CCTV. Nanging ge­ne­ya ora ana petugas sing mara aweh pitulungan nalika Alfarisi kejang. “Malah kancane sa-blok sing nggawa menyang poliklinik. Petugas lirwa ing prekara iki,” ujare Fatkhul.

Kepala Rutan Medaeng Tristiantono Adi Wibowo mratelak­ake Alfarisi nduweni riwayat kejang saploke ditahan ing kantor pulisi. Miturut katrangane dhokter poliklinik rutan, Alfarisi tinggal donya merga gagal napas. “Lapurane dhokter poliklinik mengkono,” ujare Tristiantono.

Ngenani tilas tatu akibat dipilara ing dhadhane kurban, Tris­tiantono kandha pihak rutan wis nuduhake kahanan jisime Alfarisi marang kulawarga sadurunge dipasrahake. Wek­tu kuwi, ujare Tristiantono, kulawargane kurban ora ko­mentar apa-apa. “Nalika jenazah dipasrahake, pihak kula­warga gelem tandha tangan,” kandhane Tristiantono dikutip saka tempo.co.

Direktur Eksekutif Amnesty International Indonesia Us­man Hamid kandha penyebab tiwase Alfarisi isih peteng. Yen ana bukti menawa petugas rutan lirwa, akibat ukume bisa serius. “Kudu ana penyelidikan pro justitia kanggo ngung­kap ana sing ora wajar samburining tiwase Alfarisi,” ujare Usman. Mesthine Selasa 30 Januari 2026 kuwi majelis hakim ma­cak­ake vonis ukuman tumrap Alfarisi. Nanging merga ter­dakwa wis tinggal donya, prekara ukume dicuthel tekan semono. Suprandene Fatkhul Khoir minangka pengacarane Alfarisi tetep ndheseg marang kapulisen amrih penyebab tiwase nom-noman mau diusut. “Yen perlu dianakake eks­humasi (ngotopsi jisim sing wis dikubur),” kandhane Fatkhul.

Panulis: KSW