Menteri Koordinator Bidang Pangan Zulkifli Hasan mratelakake Koperasi Desa (Kopdes) Merah Putih isih ngenteni harmonisasi aturan turunan Kementerian Keuangan supaya plafon silihan dhuwit saka Himpunan Bank Milik Negara (Himbara) bisa sacepete digunakake. Zulkifli yakin proses harmonisasi aturan iku rampung ing wektu 1-2 minggu iki. “Plafon silihan ing Bank Himbara durung bisa digunakake awit isih ngenteni aturan,” kandhane Zulkifli ing Istana Jakarta, Senen, 25 Agustus 2025.
Zukifli janji bakal nyusun petunjuk pelaksanaan (juklak) sarta petunjuk teknis (juknis) ngenani pembiayaan mau ing wektu rong minggu. Dheweke optimistis 15.000 Kopdes Merah Putih siap operasi wiwit Agustus 2025 iki. Kopdes Merah Putih klebu program prioritase Presiden Prabowo.
Wakil Menteri Koperasi Ferry Juliantono kandha harmonisasi pembiayaan iku wis rampung dibahas dening kementerian lan lembaga sing ana gayute karo Kopdes Merah Putih. Dhokumen kuwi bakal dadi pedhoman tumrap satgas nasional lan satgas provinsi, kabupaten/kota nyengkuyung operasine Kopdes Merah Putih.
Juklak lan juknis sing lagi disusun iku, kandhane Ferry, ngemot kriteria sarta prosedhur dhasar kopdes endi wae sing oleh nampa silihan dhuwit kasebut salaras karo usulane DPR dalah perbankan. Mula terbite aturan kuwi diajab bisa nyepetake operasionale Kopdes Merah Putih cacah ewon saindenging Indonesia.
Udakara 7.000 nganti 16.000 Kopdes Merah Putih sing kedhaptar liwat microsite diutamakake oleh akses pembiayaan tahap awal menyang Bank Himbara. Tahap awal iki ngutamakake kopdes sing wis nduweni sarana lan prasarana fisik, sarta ekosistem bisnise wis mlaku. (Antara)
Panulis : Antara
Edhitor : Tim Redhaksi Panjebar Semangat Digital
