Presiden Prabowo Subianto sacara simbolis masrahake kuncine pesawat angkut Airbus A400M marang Panglima TNI Jendral Agus Subianto ing Lanud Halim Perdana Kusuma Jakarta, Senen, 3 November 2025. Sabacute dening Panglima Agus kunci mau dipasrahake marang KSAU Marsekal Mohamad Tonny Harjono. Samengko pesawat “raseksa” iku dipapanake ing Skuadron 31 Halim.
Pesawat jumbo sing mampu mabur 11 jam nonstop tanpa ngisi bahan bakar kasebut siji saka loro sing dipesen Prabowo saka Spanyol rikala panjenengane isih njabat Menteri Pertahanan. Airbus A400M mligi dirancang kanggo nyengkuyung misi pengangkutan taktis lan strategis, kalebu kanggo ngirim pasukan sarta logistik menyang maneka medhan. Pesawat dirancang kuwat nggawa beban 37 ton utawa tikel pindhone pesawat angkut Hercules.
Ora mung mumpuni ing babagan pertahanan, Airbus A400M uga bisa difungsekake kanggo misi-misi sosial kemanusiaan. Bodhine sing jembar kuwawa dimomoti trek bahan bakar kapasitas 80 ton lan eskavator. Pesawat uga keconggah ngangkut 116 tentara sikep senjata lengkap. Upama arep difungsekake minangka tanker udara, Airbus A400M uga kena. Pesawat mau iya bisa digunakake dadi ambulan udara. “Airbus A400M iki bakal sansaya mikuwati pertahanan udara kita,” ngendikane Prabowo.
Presiden nuturake, wilayah gegana Indonesia sing ngayomi ewonan pulo Nusantara banget ambane, meh padha karo sajembare Benua Eropa. Mula kekuwatan udara Indonesia wigati ditambah kanggo nyengkuyung maneka kepentingan strategis nasional. Miturut Prabowo kejaba pesen Airbus A400M rong unit, isih tinarbuka kalodhangan tumrap Indonesia nambah patang unit maneh yen dirasa isih kurang. (Antara)
Panulis : Antara
Edhitor : Tim Redhaksi Panjebar Semangat Digital
