Presiden Prabowo Subianto paring apresiasi kang dhuwur marang operasine 100 Sekolah Rakyat (SR). Manut panjenengane, realisasi 100 SR nganti Juli 2025 klebu ngedab-edabi amarga bisa kaleksanan ing wektu 6 sasi saploke digagas nem sasi kepungkur. Miturut presiden, panjenengane nggagas madege SR sasi Februari 2025. Kabeh menteri ngyakinake menawa idhe kuwi bisa dileksanani ing wektu setengah taun.
Maune Prabowo mangu-mangu. Mungguhe presiden, SR lagi bisa dibukak Juli 2026. “Para menteri lapuran. Wislah aja dipeksa, aku ngerti piye angele ngrancang gagasan anyar,” tuture Prabowo, Setu, 23 Agustus 2025.
Mula yen akhire 100 SR iku bisa diwujudake jrone wektu 6 sasi, Prabowo ora ngira bisa kaleksanane cepet banget. Menteri Sosial Saifullah Yusuf, ngendikane Prabowo, lapuran menawa 100 SR wis bisa miwiti pasinaon Juli 2025. Sabanjure September 2025 mengko SR sing operasi mundhak dadi 165.“Ya iki Kabinet Merah Putih. Yen ditugasi kabeh saiyeg saekapraya nyambut gawe. Ora ana dina libur, ora ana jam kerja, kabeh kerja. Pangajabku taun ngarep Sekolah Rakyat sing bukak dadi 200,” ucape Prabowo. (Antara)
Panulis : Antara
Edhitor : Tim Redhaksi Panjebar Semangat Digital
