Presiden Prabowo Subianto ngraos gumbira dene program Makan Bergizi Gratis (MBG) sing dicanangake, samengko wimbuh maju. Rasa senenge Prabowo iku dipratelakake sawise nampa lapurane Kepala Badan Gizi Nasional (BGN) Dadan Hindayana ing Istana Kepresidenan, Selasa bengi, 12 Agustus 2025. Lapuran ngrembakane MBG mau diaturake Dadan marang presiden mbarengi rapat winates kang ngrembug ngenani keamanan nasional lan ketahanan pangan karo para pejabat kawogan.
Dadan, kang aweh katrangan pers sawise rapat rampung, ngandharake menawa realisasi APBN kanggo MBG nganti tanggal 11 Agustus 2025 wis nggayuh Rp 8,2 triliun. Anggaran semono mau antara liya kanggo mbentuk 5.103 Satuan Pelayanan Pemenuhan Gizi (SPPG) ing 38 provinsi, 502 kabupaten lan 4.770 kecamatan. “Kang nampa manfaat saka program iki akehe wis luwih 15 juta, kepara wis nyedhaki 20 juta,” kandhane Dadan.
Miturut Dadan dhuwit Rp 8,2 triliun sing diglontorake APBN mau difokusake kanggo nambah asupan gizine bocah-bocah murid sekolah, sarta ibu-ibu nggarbini. Pangajabe Dadan, nganti akhir taun 2025 iki ana SPPG cacah 8.000 sing dioperasekake kanthi target panampa manfaat nyedhaki 20 juta.
Dadan nambahake, wis akeh mitra sing dhaptar nyengkuyung program MBG. Antara liya Kamar Dagang dan Industri (Kadin), Mabes Polri, TNI, Nahdlatul Ulama, Muhammadiyah lan Badan Intelijen Negara (BIN). Sebageyan ing antarane malah wis mbangun SPPG sacara mandhiri. Mligi program MBG iki, Dandan ngira-ira wis ana dhuwit Rp 28 triliun sing muter ana tengahe masyarakat. Dhuwit kuwi murni saka mitra, dudu APBN. Mula tumrap sing dudu SPPG mandhiri, BGN sacepete nindakake proses verifikasi, proses administrasi, proses pembiayaan, sarta edukasi bab asupan gizi amrih para mitra program MBG kasebut tumuli bisa tumandang mbiyantu lancare program pamarentah mau. Dadan yakin program MBG saya rancag salaras karo gegadhangane Presiden Prabowo. (Antara)
Panulis : Antara
Edhitor : Tim Redhaksi Panjebar Semangat Digital
