Menteri Koperasi (Menkop) Ferry Juliantono mratelakake, ing awal masa jabatane, dheweke bakal mbudidaya amrih saben Koperasi Desa/Kelurahan (Kopdes/Kopkel) Merah Putih nduweni unit usaha. Ferry fokus marang nem unit usaha utama, yaiku toko, apotek, klinik, gudhang, logistik lan usaha simpan pinjam.
“Ana uga kegiyatan-kegiyatan sing salaras karo karakteristik lan kebutuhan desa/kelurahan sing bakal dibukak kementerian koperasi,” tuture Ferry sawise prosesi serah terima jabatan Menteri Koperasi saka Budi Arie Setiadi marang dheweke, Selasa, 9 September 2025. Reshuffle kabinet ora mangaribawani program-programe kementerian, klebu kopdes/kopkel.
Supaya program mau enggal bisa kaleksanan, Ferry mesthekake plafon dana Rp 3 miliar kanggo saben koperasi desa bisa dicairake ing wektu sing ora suwe. Nanging sadurunge plafon dhuwit mau mudhun, pengurus koperasi dijaluk nyinau luwih dhisik prosedhur tata carane pencairan dana amrih ora nuwuhake korupsi. Ferry kandha Kopdes/Kopkel Merah Putih dadi proyek strategis nasional ing pamarentahane Presiden Prabowo. Kanthi anane koperasi mau diajab masalah-masalah ekonomi ing tingkat desa/kelurahan alon-alon bisa dirampungake. Kejaba kuwi koperasi mau diajab bisa mbukak lapangan kerja. (Antara)
