Direktur Promosi Kesehatan dan Pemberdayaan Masyarakat Kementerian Kesehatan Elvieda Sariwati mratelakake, adhedhasar asile Cek Kesehatan Gratis (CKG) marang 30 juta penduduk, diweruhi 36 persen klompok umur diwasa lan lanjut usia (lansia) ngalami obesitas sentral apadene obesitas sistemik. “Ateges yan dirata-rata 1 saka 3 penduduk sing wis nindakake CKG ngalami obesitas. Gunggunge wong-wong sing kena obesitas sansaya akeh,” kandhane Elvieda ing Jakarta, Senen, 29 September 2025.
Miturut asil Survei Kesehatan Indonesia taun 2018, jumlah obesitas penduduk umur 10 taun mendhuwur 21,8 persen. Limang taun candhake utawa 2023, jumlah kasebut mundhak dadi 23,8 persen. Wimbuhe warga masyarakat sing awake kelemon mau, kandhane Elvieda, disebabake dening pakulinan sedina-dinane sing ora sehat, antara liya ngonsumsi panganan lan omben-omben legi. Malah ora sethithik sing anggone ngonsumsi wiwit umur balita.
Pakulinan liyane sing njalari awak dadi mekar lemu yaiku kurang olahraga. Jumlahe masyarakat sing lumuh olahraga mau 63,4 persen. Mung 36,6 persen wae masyarakat sing rutin olahraga laras karo anjurane Badan Kesehatan Donya (WHO) yaiku 30 menit saben dinane utawa 150 per minggu kanthi intensitas entheng nganti abot.
Kejaba kuwi, ngonsumsi panganan lan omben-omben kanthi tambahan gula uga dadi sebab obesitas. Wong-wong mau ngonsumsi panganan lan omben legi luwih saka kaping telu sedina nanging ora diimbangi mangan sayuran sarta woh-wohan. “WHO nganjurake ngonsumsi sayuran lan woh-wohan limang porsi sedina,” tuture Elvieda. Dheweke kandha, masyarakat kudu maspadani timbule obesitas merga bisa njalari mlebune lelara-lelara mbebayani, kaya dene kardiovaskular, hipertensi lan diabet. Pemerintah, kandhane Evielda, ora uwis-uwis menehi edukasi supaya masyarakat ngulinakake urip sehat. (Antara)
Panulis : Antara
Edhitor : Tim Redhaksi Panjebar Semangat Digital
