Menteri Sosial Saifullah Yusuf nuturake, alokasi anggaran bantuan sosial (bansos) 2025 mundhak luwih saka Rp 110 triliun. Miturut Saifullah undhake bansos mau wujud kawigatene Presiden Prabowo Subianto marang karaharjane masyarakat, mligine pangayoman marang klompok rentan (ringkih). Undhake alokasi anggaran bansos, kandhane Saifullah, merga anane tambahan Bantuan Langsung Tunai Sementara (BLTS) lan penambahan bansos reguler kang wis disalurake periodhe Juni-Juli 2025.
Undhake anggaran, miturut Saifullah, nyakup rong program utama, yaiku Program Keluarga Harapan (PKH) sarta bantuan sembako, sing sadurunge wis duwe dhasar alokasi Rp 75 triliun. Kementerian Sosial (Kemensos) uga mimbuhi penyaluran BLTS triwulan IV (Oktober, November, Desember) Rp 900 ewu – Rp 1,2 juta supaya kemampuan tetukone masyarakat sansaya kuwat ngiras njaga pertumbuhan ekonomi nasional.
“Kebijakan iki bageyan saka strategi ekonomi Presiden Prabowo kanggo mesthekake masyarakat kang pengasilane kurang tetep kinayoman saka tekanan ekonomi, ngiras-ngirus kanggo njaga stabilitas ekonomi nasional,” ujare Saifullah sing akrab diundang Gus Ipul iki.
Miturut Saifullah Kemensos siap ngawal penyaluran bansos amrih ora ana potongan ing lapangan. Sebab ana kalane dhuwit bansos sing ditampa masyarakat cacahe susut jalaran diunthet dening oknum petugas penyalur. Saifullah ngelingake masyarakat panampa bansos amrih nggunakake dhuwit kuwi kanggo kebutuhan sing bener-bener ndheseg, ora malah dienggo nyaur utang lan botohan.
“Kemensos njaluk pangapura yen ana masyarakat sing durung keduman bansos. Sebab Kemensos lan Badan Pusat Statistik (BPS) lagi nganyari data supaya penyalurane bansos akurat, transparan lan adil,” kandhane Saifullah. (Antara)
Panulis : Antara
Edhitor : Tim Redhaksi Panjebar Semangat Digital
