Bupati Pacitan, Jawa Timur, Indrata Nur Bayuaji ngapresiasi panyengkuyunge Kementerian Ekonomi Kreatif kang nggelar workshop (pelatihan) ngenani strategi pemasaran tumrap seniman seni rupa lan seniman seni pertunjukan. Miturut Indrata pelatihan mau banget migunani mungguhe seniman amrih darbe wawasan tambahan ngenani carane masarake karya-karyane, mligine lumantar platform media sosial.
“Supaya karya-karya seni asal Pacitan iki bisa luwih dikenal ing tingkat nasional,” kandhane Indrata, Jumuah, 7 November 2025.
Workshop kang digelar Direktorat Seni Rupa dan Seni Pertunjukan Deputi Bidang Kreativitas Budaya dan Desain Kementerian Ekonomi Kreatif mau ditekani dening para pelaku seni rupa lan seni pertunjukkan sing aktif nyiptakake karya. Pasarta kanthi antusias melu kegiyatan kuwi nganti rampung.
Miturut Indrata, seniman kerep kangelan masarake asil karyane senadyan duwe kreativitas dhuwur. Saengga kolaborasi antarane pemerintah daerah lan pemerintah pusat mau diajab mbukak kalodhangan kang luwih omber tumrap pelaku seni lokal masarake asil karyane mau.
Direktur Seni Rupa dan Seni Pertunjukan Kementerian Ekonomi Kreatif Dadam Mahda nuturake, pasarta workshop diajak mahami proses pemasaran wiwit tahap kreasi, prodhuksi engga dhistribusi. “Sing bisa difasilitasi mung prodhuk seni kang wis nduweni Hak Kekayaan Intelektual (HKI),” ucape Dadam.
Miturut Mahda nyathetake karya seni menyang HKI banget wigati kanggo ngayomi karya seni kasebut saka upaya-upaya nyalahgunakake apadene reproduksi tanpa idin kang tundhone mitunani sacara finansial lan reputasine seniman penciptane mau. (Antara)
Panulis : Antara
Edhitor : Tim Redhaksi Panjebar Semangat Digital
