Pemerintah Kota (Pemkot) Surabaya nggelar Sosialisasi lan Gelar Wicara PUSPAGA 2026 kanthi tema “Membangun Ruang Digital yang Aman untuk Anak” tanggal 1 April 2026.
Kegiatan iki dadi bagéan saka upaya nguwataké pangayoman bocah ing era digital, sekaligus cocog karo implementasi PP Nomor 17 Taun 2025 bab Tata Kelola Penyelenggaraan Sistem Elektronik jroning Perlindungan Anak (PP TUNAS).
Wali Kota Surabaya, Eri Cahyadi, nandhesake yen perlindungan bocah ing ruang digital ora cukup mung liwat aturan, nanging uga butuh cawe-cawene keluarga lan sekolahan. Miturut Cak Eri, pengawasan panganggone media sosial marang bocah kudu diwiwiti saka omah, ngelingi wektune bocah luwih akeh dientekake karo keluarga.
“Pengawasan iki gumantung banget klawan cawe-cawene wong tuwa. Amarga kaya ngapa wae, bocah luwih akeh ing omah tinimbang ing sekolahan,” tandhese Wali Kota Eri, Selasa kepungkur (31/3/2026).
Kegiatan PUSPAGA 2026 dieloni 5.702 peserta saka kabeh jenjang pendidikan ing Surabaya, wiwit SD nganti SMA sederajat. 1.156 peserta teka langsung, dene 4.546 liyané nggabung sacara daring, nyawijekaké komitmen jroning sawijining gerakan perlindungan bocah ing ruang digital.
Ing rangkaian acara, peserta diajak ndeleng refleksi liwat video “Jejak Digital, Dampak Nyata” sarta melu polling sing motret kahanan riil kasus bullying siber ing lingkungan sekolah.
“Momentum iki diajab dadi ruang edukasi bareng kanggone murid, guru, lan wong tuwa supaya luwih mangerteni risiko sekaligus tanggung jawab jroning nggunakake teknologi,” tambahé.
Puncak acara kanthi pratandha deklarasi “Sekolah Ramah Digital” sing dipimpin langsung Wali Kota Eri bebarengan wakil kepala sekolah saka maneka jenjang pendidikan. Deklarasi kasebut ngemot komitmen Tri Darma Digital, yaiku Darma Perlindungan, Darma Pendidikan, lan Darma Pengawasan minangka fondhasi bareng jroning mbangun ekosistem digital sing aman.
“Para siswa uga ngucapké ikrar minangka generasi cerdas digital liwat deklarasi bocah Surabaya, sing nandhesake nulak anane pornografi, bullying siber, radikalisme, uga kecanduan gawai. Kabeh peserta uga melu nandatangani komitmen sacara digital minangka simbol gerakan bareng,” jelasé.
Miturut Wali Kota Eri, kegiatan iki mujudake perangan saka strategi berkelanjutan Pemkot Surabaya sing sadurungé wis ngetokaké Surat Edaran bab watesan nggunakake gawai lan internet kanggo bocah.
Kebijakan kasebut matesi lan ngawasi, dudu nglarang total, supaya bocah tetep bisa nggunakaké teknologi sacara sehat lan produktif.
“Bocah-bocah durung duwé kemampuan lengkap kanggo milah konten. Mula iku, wong dewasa penting banget ngampingi,” ujaré.
Cak Eri nambahaké, penguwatan literasi digital liwat PUSPAGA 2026 dadi langkah konkret kanggo nerjemahaké kebijakan nasional, kalebu PP TUNAS lan watesan akses media sosial kanggo bocah sangisore umur 16 taun, menyang gerakan nyata ing tingkat daerah.
“Kanthi pendekatan kolaboratif antarané pemerintah, sekolah, lan keluarga, Surabaya ngupaya nyiptakake ruang digital sing aman sekaligus mbentuk karakter generasi mudha sing wicaksana jroning migunakake teknologi,” pamungkasé. ***
Editor : Donny Tunggul
Sumber : Rilis Pemkot Sby
