Pemerintah Kota (Pemkot) Surabaya terus nambah panggonan parkir digital, apa kuwi ing pinggir dalan umum (TJU) utawa ing area parkir halaman persil. Upaya iki ditindakake kanggo njawab kabutuhan masyarakat sing pengin sistem parkir sing luwih transparan, akuntable, lan gampang digunakake liwat maneka pilihan cara mbayar non-tunai.
Wali Kota Surabaya Eri Cahyadi ngandhakake, digitalisasi parkir dadi salah siji program sing oleh kawigaten gedhé saka warga. Mula, Pemkot Surabaya bebarengan Forum Koordinasi Pimpinan Daerah (Forkopimda) terus njurung ngleksanani sistem parkir non-tunai minangka bagian saka ningkataké kualitas layanan publik adhedhasar teknologi.
“Kita karo Forkopimda Kutha Surabaya terus ngupaya njawab kabutuhan lan pepenginane warga. Salah sijiné liwat penerapan parkir digital non-tunai sing dadi pangajabe masyarakat Surabaya,” ujare Wali Kota Eri Cahyadi, Rebo (27/6/2026).
Miturut Pak Wali, kebijakan kuwi lair saka aspirasi warga sing kepéngin pengelolaan parkir luwih jelas lan ana tanggungjawabe. Mula, pemkot komitmen nyepetake pangecake parkir digital ing maneka wilayah Surabaya.
“Kekarepané warga Surabaya dadi kawigaten utama kita. Salah sijine yaiku ngecakake parkir digital mawa basis non-tunai sing pancèn diarep-arep masyarakat, saengga kita nindakake,” jelasé.
Saliyane gampang, digitalisasi parkir uga dadi salah sijine upaya Pemkot Surabaya jroning ningkatake transparansi pangelolaan retribusi lan ngoptimalakaké Pendapatan Asli Daerah (PAD).
Kanthi sistem non-tunai, Wali Kota Eri nerangaké kabeh transaksi kacathet sacara digital saengga bisa ngurangi prasangka bab mbayar parkir lan bagi hasil antarane pamaréntah karo juru parkir.
“Kanthi sistem digitalisasi mula bakal ngilangaké prasangka bab mbayare parkir. Kanthi non-tunai iki warga bisa mbayar miturut sing ditemtokaké lan luwih transparan,” ujare.
Data Dinas Perhubungan (Dishub) Kutha Surabaya per 9 Juni 2026 nyathet, jumlah petugas parkir sing wis ngecakake sistem digital ana wong 926. Angka kuwi ningkat dibandhing sakdurungé sing cacahé 819 petugas parkir.
Perluasan layanan parkir digital uga wis nggayuh sawetara dalan anyar, kayata kawasan Stasiun Kota, Perak Timur, Perak Barat lan Tambak Bening.
Sadurungé, sistem sing padha wis dicakake ing maneka titik Surabaya Pusat, Kulon, Wétan, lan Lor, kaya Bratang Binangun, Bratang Gede, Ngagel Tengah, Nginden, Nginden Semolo, Prapen, Tenggilis Barat, Klampis, Jagir Wonokromo, Manyar Kertoarjo, Manyar Tegal, Rungkut, Bukit Darmo Boulevard, Kupang Gunung, Darmokali, nganti Karang Menjangan.
Kanggo nggampangaké warga, mbayar parkir digital saiki bisa ditindakake liwat maneka cara. Warga bisa nganggo QRIS utawa kartu dhuwit elektronik utawa e-toll sing bisa diproses liwat telpon pinter, mesin Electronic Data Capture (EDC) duwéke tukang parkir, nganti QRIS sing dipasang ing rompi resmi petugas.
Ing lapangan, saben juru parkir resmi saiki dilengkapi rompi khusus nganggo kode QRIS ing bagian dhadhane tengen lan kiwa. Inovasi kuwi aweh alternatif mbayar sing luwih praktis kanggo warga, sekaligus ngatasi masalah yèn piranti telpon seluler petugas ngalami gangguan.
Pelaksana Tugas (Plt) Kepala Dishub Surabaya Trio Wahyu Bowo njelasake, pangecake parkir digital wiwit nuduhaké dampak positif marang penerimaan daerah. Adhedhasar evaluasi Dishub, oleh-olehan saka sektor retribusi parkir ngalami undhak-undhakan watara 10 persen sajege sistem digital iki dicakake.
“Peningkatan pemasukan parkir sawisé digitalisasi watara 10 persen. Undhak-undhakan iki amarga sistem digital nyathet luwih transparan,” ujare Trio Wahyu Bowo.
Miturut Trio, undhak-undhakan kuwi cukup signifikan dibandhingaké periode sing padha taun sakdurungé. Senajan programe wis diwiwiti wiwit Januari 2026, implementasi sing efektif lagi mlaku ing Maret nganti April sawisé distribusi piranti telpon pinter marang para juru parkir rampung ditindakake. “Kita bakal terus nindakake evaluasi gegandhengan ningkate pendapatan retribusi iki,” ujare.
Trio uga nerangaké, realisasi oleh-olehan parkir ing 2025 nggayuh Rp25 milyar. Kanthi perluasan penerapan parkir digital lan dhukungan warga nggunakake cara pambayaran non-tunai, pihaké optimistis oleh-olehan sektor parkir bisa tambah nganti 40-50 persen ing taun-taun sing bakale.
“Pangajab kita mesthi wae kanthi optimalisasi parkir digital PAD bisa terus tuwuh nganti 50 persen saka taun sakdurungé,” pangajabe.
Kanggo nguwataké pengawasan, Dishub Surabaya uga nggawe sawenehing inovasi anyar. Saliyane masang papan informasi sing ngemot identitas lan foto resmi juru parkir ing saben titik layanan, luwih saka 900 jukir resmi saiki wis nganggo rompi khusus sing dilengkapi QRIS pambayaran.
“Kita uga mepaki luwih saka 900 jukir resmi nganggo rompi khusus sing duwé kode QRIS ing sak dhadhane. Sisih tengen rompi kanggo mbayar kendaraan rodha loro lan sisih kiwa kanggo kendaraan rodha papat,” ujare.
Liwat sistem kuwi, warga sing mbayar nganggo layanan perbankan digital cukup mindhai kode QRIS sing ana ing rompi petugas, banjur nuduhaké bukti transaksi sawisé kasil mbayar. “Dadi ora ana alesan maneh handphone jukir mati utawa ora ana kuota,” jelase Trio.
Saliyane QRIS lan kartu dhuwit elektronik, Dishub Surabaya uga nyedhiyani opsi mbayar liwat voucher parkir. Saiki, Pemkot Surabaya lagi njajagi kerja sama karo jaringan toko ritel modern lan pelaku UMKM kanggo nambah akses tuku voucher parkir kanggo masyarakat.
Ing babagan liya, Pemkot Surabaya uga ngajak warga supaya aktif melu nyuksesaké program digitalisasi parkir. Warga diimbau supaya biasa mbayar non-tunai lan luwih teliti mriksa identitas tukang parkir sing tugas ing lapangan.
Yèn nemokake jukir sing identitase ora cocog karo foto sing ana ing papan informasi resmi, warga ora usah gelem mbayar lan langsung lapor marang pihak sing terkait.
“Dakajab warga Surabaya nalika weruh petugas parkir rupane ora cocok karo foto sing ana ing papan rambu, ora usah mbayar. Aja gelem mbayar,” tandhesse.
Miturut Trio, panganggone sistem non-tunai bakal mbantu ngilangi stigma negatif gegandhengan pangelolaan dana parkir, amarga kabeh transaksi kacathet sacara digital lan bisa dipantau. Oleh-olehan sing ditampa mengkone bakal dibalekaké marang masyarakat liwat maneka program pambangunan Kutha Pahlawan.
Saliyane kuwi, data transaksi sing kacathet ing sistem uga bisa dimanfaataké kanggo nggambarake kondisi sosial ekonomi juru parkir. Kanthi mangkono, Pemkot Surabaya bisa aweh intervensi kesejahteraan sing luwih pas sasaran. “Data performa oleh-olehan harian jukir sing kacathet ing sistem digital uga digunakaké kanggo pengasilan sosial jukir, apa mlebu ing kategori desil 1 nganti 5. Yèn wis mlebu data, kita bakal aweh intervensi utawa perlakuan kesejahteraan khusus ing akhir wulan,” pungkasé. (ADV)
