Pati Ora Sepele

Hakim matrapi ukuman 6 sasi marang aktivis Aliansi Masyarakat Pati Bersatu (AMPB) Supriyono “Bothok” lan Teguh Istiyanto. Lelorone ora perlu nglakoni ukuman kurungan jalaran terus dibebasake kanthi pengawasan sajrone 10 sasi.

Majelis hakim Pengadilan Negeri Pati, Jawa Tengah nibakake vonis ukuman 6 sasi marang pentholan aktivis Aliansi Masyarakat Pati Persatu (AMPB) Supriyono alias Bothok lan Teguh Istiyanto, Kemis, 5 Maret 2025. Ketua majelis hakim Muhammad Fauzan jrone amar putusane nerangake menawa Bothok lan Teguh kabukten luput nindakake pidana  penghasutan kaya kang diatur Pasal 150 KUHP kang diformulasi marang Pasal 264 KUHP Nasional.

Sok ngonowa lelorone ora dilebokake pakunjaran. Minangka ijole, sasuwene 10 sasi tindak-tanduke Bothok lan Teguh bakal diawasi dening aparat hukum. Yen nganti nindakake pakarti-pakarti kang mungguhe aparat nerak aturan, Bothok lan Teguh lagi dilebokake kurungan.

Putusane majelis hakim mau pinapag surak mawurahan dening massa cacah ewon kang wiwit esuk ‘ngepung’ kantor pengadilan. Metu saka ruwang sidhang, lelorone terus diarak rame-rame. Dipanggul genti genten dening masyarakat kang melu ngrasakake bungah. Bengokan, “Pati ora sepele!” ngumandhang.

Sidhang putusan mau uga dirawuhi dening mantan Wakapolri Komisaris Jenderal (Purnawirawan) Oegroseno lan putri warujune mantan presiden Gus Dur, Inayah Wulandari Wahid kang sabela terdakwa. Ketua Badan Eksekutif Mahasiswa Universitas Gadjah Mada (UGM) Tiyo Ardiyanto uga hadhir nyengkuyung Bothok lan Teguh.

Pengacarane terdakwa, Nimerotin Gulo, muji syukur dene wekasane klien sing dibela dipatrapi ukuman percobaan. Ya senadyan pakartine dianggep luput, nanging ora perlu nglakoni ukuman penjara jalaran vonise kurang saka setaun.

“Nanging aku tetep cuwa karo isi putusane hakim jalaran putusan kuwi padha karo mbungkem aktivis amrih ora nindakake unjuk rasa,” ujare Nimerotin dikutip saka Kantor Berita Antara.

Miturut Nimerotin, pawadane majelis hakim menawa Bothok lan Teguh nggasut massa amrih mblokir dalan pantura sarta ora njaluk idin pulisi nalika arep ngadani kegiyatan unjuk rasa, diwawas kurang pas. Merga yen manut katemtuwane Pasal 256 KUHP kang anyar, kegiyatan unjuk rasa ora perlu njaluk idin, nanging cukup menehi pemberitahuan marang pulisi.

Pimpinane unjuk rasa, kandhane Nimerotin, lagi bisa dipatrapi ukuman yen jrone kegiyatane mau nimbulake akibat arupa kacilakan, kerusakan, kurban tatu-tatu, lan kematian. “Yen ora ana akibat kaya sing daksebutake kuwi, ateges ora bisa digolongake tindak pidana,” tuture Nimerotin.

Bupati Sudewo

Prekara kang nggiring Bothok lan Teguh menyang sangarepe meja ijo mau kawiwitan nalika leloronge nggalang dhemonstrasi gedhen ing Kantor Bupati Pati, 13 Agustus 2025. Dhemonstrasi iku digelar kanggo mrotes rancangane Bupati Pati Sudewo kang duwe ada-ada ngundhakake Pajak Bumi dan Bangunan (PBB) 150 persen. Sudewo kober ‘nantang’ masyarakat Pati sing ora sarujuk karo rancangan mau amrih unjuk rasa.

‘Tantangane’ Sudewo ditanggapi Bothok lan Teguh kanthi nggalang massa cacah ewon dhedhampyakan tumuju jantung kutha kabupaten kang duwe julukan Pati Bumi Mina Tani iku. Ujare kandha, ombyake unjuk rasa ing Pati mau kang paling gedhe jumlah massane saplone dhemonstrasi nuntut reformasi 1998.

Nadyan sawatara dina sadurunge wanci dheng-e unjuk rasa Sudewo wis nyatakake wurung ngundhakake pajeg PBB, nanging masyarakat sing kadhung nesu tetep ora preduli. Kepara tuntutane masyarakat tambah. Saka sing maune njaluk supaya undhake pajeg PBB diwurungake, saiki ganti ndheseg amrih Sudewo dilorod saka palungguhane.

Mbarengi dina unjuk rasa, Sudewo kober muncul ana sandhuwure kendharaan lapis waja duweke Brimob kang diparkir sangareping pendhapa kabupaten. Sudewo njaluk ngapura atas rancangan arep ngundhakake pajeg PBB mau. Nanging durung ana setengah menit dheweke mencungul saka kendharaan rantis, sawatan sandhal lan botol banyu ngombe ngrutug Sudewo. Sudewo age-age ndlesep maneh banjur diplayokake pulisi menyang panggonan aman.

Nadyan Sudewo wis njaluk ngapura, nanging dhesegane sebageyan masyarakat amrih dheweke lereh jabatan ora mendha. Kanggo nanggepi aspirasine masyarakat mau, DPRD Pati banjur nggelar sidhang paripurna kang agendhane nindakake pemakzulan (nglorod) Bupati Sudewo 31 Oktober 2025. Sidhang paripurna iku ‘dikawal’ dening pengunjuk rasa cacah atusan kang digalang Bothok lan Teguh.

Suprandene asile sidhang ora maremake pengunjuk rasa. DPRD Pati gagal nglorod Sudewo jalaran fraksi-fraksi sing ana ora kompak. Saka sakehing fraksi, mung PDIP dhewe sing sarujuk Sudewo dilengserake. Dene fraksi-fraksi liyane, klebu Fraksi Gerindra minangka partaine Sudewo, mepalangi kekarepan nglengserake bupati.

Ora marem karo asile sidhang paripurna, Bothok, Teguh lan masyarakat sing ndheseg mundure Sudewo ganti mblokir dalan gedhe Pati-Juwana. Pantura macet total. Pulisi banjur nangkep Bothok lan Teguh merga dituding nggasut masyarakat supaya nutup dalan nasional mau. Penangkepane Bothok lan Teguh nuwuhake kacubriyan merga surat perintah penangkapan wis digawe wiwit sadurunge unjuk rasa mblokir dalan dileksanani.

Ditangkep KPK

Ing swasana Kabupaten Pati sing durung kondhusif sawutuhe akibat gerakan massa mau, ndadak muncul babak anglayoni. Bupati Sudewo dirangket Komisi Pemberantasan Korupsi (KPK) 19 Januari 2026. Dicekel ceg nalika meneri ‘transaksi’, saengga barang buktine arupa dhuwit Rp 2,6 milyar cumawis. Penangkepan sing kaya ngene iki diarani operasi tangkap tangan (OTT). Sudewo ora bisa selak.  

Sedina candhake, 20 Januari 2026, Sudewo diglandhang menyang gedhung KPK ing Jakarta kanthi status tersangka. Kejaba Sudewo, tersangka liyane yaiku Kepala Desa Karangrowo Abdul Suyono, Kepala Desa Arumanis Sumarijiono lan Kepala Desa Sukorukun Karjan.

Miturut KPK Sudewo nindakake korupsi cacah loro. Sepisan, dol tinuku jabatan perangkat desa (sekretaris desa, kepala seksi, kepala urusan). Ing prekara iki Sudewo dinuga kongkonan wong-wong kang pinercaya amrih meres perangkat desa sing dadi sasarane dol tinuku jabatan mau. Kapindho, kesangkut kasus suap proyek jalur sepur ing Direktorat Jendral Perkeretaapian (DJKA) Kementerian Perhubungan rikala Sudewo isih dadi anggota DPR biyen.

Nganti dina samengko proses penyidikan marang Sudewo isih lumaku. Ora gampang tumrap KPK ngorek keterangane seksi awit racake padha dene ora gelem blaka. Juru bicara-ne KPK Budi Prasetyo kandha penyidik isih nggoleki dhalang suwalike layar sing akon para seksi supaya ora menehi keterangan sing ora sanyatane. Yen ketemu, pawongan kasebut uga bakal diproses ukum.

KPK wis nlesih marang Kepala Subbagian Tata Usaha Puskesmas Tambakromo, Pati, Noor Eva Khasanah lan Kepala Desa Angkalan Lor Sudiyono. Miturut Budi Prasetyo, Noor Eva Khasanah lan Sudiyono nglumpukake seksi-seksi sing arep dijaluki katrangan KPK kanthi ‘ndikte’ jawabane. Satemah jawabane para seksi mau ora jujur.

KPK, kandhane Budi, nggoleki dhalang kang akon Noo Eva lan Sudiyono nglumpukake seksi. Tumrap KPK, pengkondisian keterangane seksi mau rasane nggumunake yen mung ditindakake dening sawehene staf puskesmas lan kades. Penyidik yakin ana uwong sing luwih kuwat samburining Noor Eva lan Sudiyono. “KPK isih nglacak sapa mastermind sing akon para seksi ora kooperatif jrone menehi keterangan,” ujare Budi Prasetyo, Kemis, 5 Maret 2026.

Panulis: Kukuh Setyo Wibowo