Lembaga Pengelolaan Dana Bergulir (LPDB) Koperasi nyalurake modhal marang Koperasi Desa Merah Putih (KDMP) Sidomulyo, Jember, Jawa Timur, Senen, 1 Desember 2025. Penyaluran modhal mau mengku karep ngundhakake kuwalitas ekspor sarta volume prodhuksi kopi amrih tansah nembus pasar luwar negeri.
Direktur Utama LPDB Koperasi Krisdianto mratelakake, suksese KDMP Sidomulyo nembus pasar ekspor kopi sasuwene iki dadi bukti nyata menawa panyaluran modhal bergulir kuwawa ngangkat prodhuktivitase koperasi desa lan njurung kontribusine ekonomi lokal tumuju skala global.
KDMP Sidomulyo pancen wis kasil nembus pasar kopi njaban rangkah. Ekspor sepisanan arupa 20 ton green beans kopi robusta menyang Mesir pengaji Rp 1,3 miliar. Miturut Krisdianto, KDMP Sidomulyo wis mbuktekake menawa koperasi desa nyatane kuwagang nggerakake sektor riil, ngundhakake oleh-olehane petani, sarta dadi beteng ketahanan pangan dhaerah. “Kanthi pembiayaan LPDB, koperasi sanggup mikuwati pasokan komodhitas pertanian saengga karaharjane petani mundhak,” ujare.
Pengawas KDMP Sidomulyo Kamiludin ngandharake, koperasine dadi pelopor nembus pasar ekspor njaban rangkah. Ora mung Mesir, nanging uga Cina, Kanada lan Turki. Taun iki, kandhane Kamiludin, KDMP Sidomulyo ngekspor patang kontainer kopi kanthi pengiriman perdana 20 ton pengaji Rp 1,3 miliar. Taun 2026 KDMP Sidomulyo wis darbe rancangan ngekpor 3.000-5.000 ton kopi menyang Mesir.
Bupati Jember Muhammad Fawaid nuturake KDMP Sidomulyo minangka koperasi percontohan nasional jalaran sing sepisanan ngekspor kopi menyang mancanegara. Manut bupati, modhal bergulir LPDB Koperasi kuwawa ngungkit koperasi desa nindakake akselerasi bisnis. “Yen taun iki kredhite Rp 800 juta, taun ngarep kudu luwih akeh maneh. Iki dudu bantuwane pamarentah, nanging kredhit saka LPDB Koperasi,” kandhane. (Antara)
Panulis : Antara
Edhitor : Tim Redhaksi Panjebar Semangat Digital
