Prabowo: 1.800 ‘Perlintasan Sebidang’ Dibeciki
Presiden Prabowo Subianto nyawisake anggaran Rp 4 triliun kanggo mbeciki 1.800 titik perlintasan kereta api (sapatemon antarane lurung karo ril sepur) saindenging Pulo Jawa. Presiden kepengin keslametane para penumpang transportasi umum sangsaya dijamin. Pangandikane Presiden Prabowo mau kaandharake samarine mbezuk kurban tatu kacilakan sepur Argo Bromo Anggrek karo Kereta Rel Listrik (KRL) ing RSUD dr. Chasbullah Abdulmadjid, Kota Bekasi, Selasa, 28 April 2026.
Prabowo nuturake ewon titik perlintasan ing tanah Jawa mau meh kabeh mujudake infrastruktur tinggalane Landa kang wis puluhan taun ora antuk kawigaten serius. Prabowo ngakoni isih akeh panyebrangan ril sepur ora dijaga, saengga mbebayani tumrap keslametan. Prabowo paring dhawuh marang aparat kawogan amrih prekara mau tumuli ditandangi. Prabowo mundhut amrih sacepete dibangun dalan layang (flyover) sandhuwuring titik sabrangan rel sepur mau. Yen flyover durung kawujud, paling ora saben perlintasan diwenehi pos panjagan.
“Sacepete lintasan-lintasan sing mbebayani mau kita beciki. Apa nganggo flyover, apa pos panjagan, mengko kita temtokake,” ngendikane Prabowo.
Presiden nambahake, anggaran gedhe mbeciki 1.800 titik perlintasan mau kudu diwetokake saiki jalaran sepur dadi modha transportasi massal kang banget wigati tumrap masyarakat. Kupiyane pamarentah mau diajab nuntasake prekara perlintasan sebidang kang nganti 80 taun lawase ora enggal beres. Prabowo ora kepengin kacilakan sepur kedadeyan maneh ing dina-dina bacute.
Kaya kang wis kasumurupan tabrakan antarane sepur klas eksekutif Argo Bromo Anggrek lan KRL ing Stasiun Bekasi Timur kedadeyan Senen bengi, 27 April 2026. KRL kang lagi mandheg sawise nabrak taksi kang mogok ing perlintasan sebidang, ditenggel dening Argo Bromo Anggrek kang teka kanthi kebat. Nganti Selasa bengi, 28 April, penumpang KRL dinyatakake tinggal donya dene 84 nandhang tatu. Kabeh kurban manggon ana gerbong khusus wanita.
(Antara)
