Maneka Olahan Gule

Gule. Lawuh siji iki mesthi akeh pandhemene. Yen cumawis ing ngarep netra, bakale langsung njalari luwe.

Ananging, saperangan uwong ana sing nyiriki gule. Sing dadi punjering perkara yaiku bab isen-isen olahane: daging sapi utawa wedhus. Jalaran, lelorone bisa ngundhakake kolesterol.

Sejatine, ora ngrahabi daginge, nyruput kuwahe wae, wis nglawuhi. Yen kepengin enak tur tetep wareg, coba nggawe gule tanpa daging. Kaya sing kapacak ing kalodhangan iki. Ana gule godhong pohung, gule pakis, lan gule gori. Tetelune resep saka juru mangsak kondhang, Sisca Soewitomo.

GULE GODHONG POHUNG

Bahan:

1. Pucuk godhong pohung 250 gram
2. Santen 400 ml (saka klapa siji)
3. Godhong salam 2 lembar, diremet
4. Laos 2 nyari, geprek
5. Ebi/ urang garing 2 sendhok
6. Lenga kanggo nggangsa 2 sendhok
7. Teri goreng sacukupe

Bumbu, diuleg alus:

1. Lombok abang gedhe 5 iji
2. Brambang 6 siyung
3. Bawang 5 siyung
4. Jae sakros
5. Uyah sasendhok teh.

Carane mangsak:

1. Godhong pohung digodhog nganti empuk. Angkat, peres, dirajang.
2. Panasake lenga, gangsa bumbu alus lan salam, laos, uga ebi.
3. Sawise sedhep gandane, santen dicurake. Mangsak nganti umob. Aja mandheg olehe ngudhak amrih santen ora pecah.
4. Cemplungake godhogan godhong pohung, udhak, lan mangsak nganti bumbu rumesep (kuwah suda).
5. Angkat, wur-wuri nganggo teri goreng.

GULE PAKIS

Bahan:

1. Godhong pakis 250 gram, pethiki
2. Godhong salam 2 lembar
3. Laos 2 cm, geprek
4. Ebi/ urang garing 2 sendhok, dikum banyu sedhela banjur ditus
5. Santen 500 ml (saka klapa 1)
6. Lenga goreng kanggo nggangsa 2 sendhok

Bumbu, diuleg alus:

1. Lombok abang gedhe 5 iji
2. Brambang 5 siyung
3. Bawang 3 siyung
4. Kunir 2 cm, bakar sedhela
5. Mrica sasendhok teh
6. Uyah sasendhok teh

Carane mangsak:

1. Panasake lenga, gangsa bumbu alus, tambahi godhong salam lan laos.
2. Banjur imbuhi santen lan ebi, mangsak nganti umob.
3. Cemplungake pakis, mangsak nganti kuwah susut lan katon nglenga.
4. Angkat, sugatake nalika anget.

GULE GORI/THEWEL

Bahan:

1. Gori/ thewel 350 gram, iris-iris, godhog nganti empuk
2. Kacang lanjaran 8 lanjar, pethiki
3. Kobis 3 lembar, iris ukuran sedheng
4. Banyu asem 2 sendhok
5. Santen seliter (saka klapa 1)
6. Santen kenthel 500 ml (saka klapa 1)
7. Godhong salam 2 lembar
8. Laos 2 cm, geprek
9. Godhong jeruk 3 lembar

Bumbu, diuleg alus:

1. Lombok abang gedhe 6 iji
2. Brambang 8 siyung
3. Bawang 5 siyung
4. Uyah sasendhok teh
5. Mrica bubuk 1/2 sendhok teh
6. Gula pasir sasendhok teh

Carane mangsak:

1. Panasake lenga, gangsa bumbu alus, imbuhake godhong salam, laos, godhong jeruk
2. Tambahake santen encer, godhogan gori, kacang panjang, kobis. Banjur imbuhake santen kenthel.
3. Tambahake banyu asem, mangsak sedhela. Angkat.

***