Menteri Koordinator Bidang Pemberdayaan Masyarakat Muhaimin Iskandar nuturake, pambangunan Pasar 1001 Malam minangka punjere (pusat) kegiyatan ekonomi kreatif lan UMKM bakal maedahake lahan ‘aset turu’ duweke pamarentah. Miturut Muhaimin, Presiden Prabowo Subianto wis nyarujuki lahan-lahan strategis duweke negara sing nganggur digunakake kanggo papan ngrembane UMKM lan ekonomi kreatif.
“Presiden wis sarujuk marang gagasan kuwi,” kandhane Muhaimin ana saselane dhialog kanthi tema ‘Mewujudkan Ekonomi Kreatif Tangguh’ ing Semarang, Jawa Tengah, Rebo, 29 Oktober 2025.
Miturut Muhaimin akeh ‘lahan turu’ asete pamarentah kang dumunung ana papan-papan strategis, klebu ing Jakarta. Tinimbang lahan-lahan mau ora prodhuktif, luwih becik dimunpangatake dadi punjere kegiyatan ekonomi, mligine kanggo ngungkit kemandhiriane UMKM. Dinane iki, kandhane Muhaimin, UMKM dadi salah sijine pilar perekonomian negara. Sebab, UMKM nduweni kontribusi luwih saka 60 persen marang pendapatan domestik bruto (PDB) lan nyangga separo saka pertumbuhan ekonomi nasional. Sektor ekonomi kreatif uga nduweni potensi gedhe dadi motor sing nggerakake rodhane ekonomi nasional. Kontribusine nggayuh 8 persen saka total PDB. Mligi semester I 2025, sektor ekonomi kreatif nyumbang 5,69 persen saka total PDB nasional lan dadi salah sijine kontributor utama pertumbuhan ekonomi. Muhaimin bakal menehi instruksi marang Kementerian Ekonomi Kreatif lan Kementerian UMKM supaya program kasebut enggal mlaku. “Amrih UMKM lan ekonomi kreatif gampang oleh akses menyang pasar,” kandhane. (Antara)
Panulis : Antara
Edhitor : Tim Redhaksi Panjebar Semangat Digital
