Gubernur Khofifah Indar Parawansa mratelakake ekspor Provinsi Jawa Timur sadawane Januari-Oktober 2025 mundhak 16,64 persen dibandhingake Januari-Oktober taun 2024 kepungkur. Khofifah ngrujuk marang data-ne Badan Pusat Statistik (BPS). “Ekspor mundhak, kosok baline impor mudhun. Mbuktekake menawa Jatim nduweni kontribusi marang ekspor sacara nasional,” tuture Khofifah, Kemis, 4 Desember 2025.
Miturut gubernur rong periodhe iku, priyasan arupa permata mujudake materi sing paling akeh diekspor. Dibandhing taun kepungkur, volume-ne mundhak 40,3 persen. Kejaba priyasan, ekspor lemak sarta minyak hewan/nabati uga ngalami undhak-undhakan 41,35 persen lan nduweni kontribusi 7,91 persen marang total ekspor.
Sebageyan gedhe prodhuk kuwi, kandhane Khofifah, diekspor menyang Swiss. Nilaine nggayuh 4,08 miliar dolar AS. Barang-barang kang diekspor menyang Swiss mau akeh-akehe arupa priyasan, kendharaan, perkakas lan piranti dudu logam mulia. Sangisore Swiss, Tiongkok dadi negara sing uga akeh nampa ekspor saka Jatim. Nilaine nggayuh 13,03 persen kanthi total nilai ekspor 3,23 miliar dolar Amerika.
“Amerika uga nampa prodhuk ekspor non-migas Jatim sing jumlahe 12,33 persen utawa kurang luwih 3,06 miliar dollar Amerika,” kandhane Khofifah.
Mundhake ekspor, ujare Khofifah, otomatis wimbuh nguwatake ekonomi Jatim. Ngrembakane ekonomi dhaerah ing triwulan III 2025, kandhane Khofifah, 5,22 persen (year-on-year), luwih onjo dibandhingake ekonomi nasional 5,04 persen. Sacara triwulan (quarter to quarter), ekonomi Jatim mundhak 1,70 persen lan dadi kang paling dhuwur dibandhingake provinsi-provinsi liyane ing Pulo Jawa.Ing sisih liya, inflasi Jatim sasi November 2025 2,63 persen (year-on-year) isih jrone kisaran 2,5 persen. Kanthi inflasi semono mau, daya tetukone masyarakat isih kajaga. Mligi ngenani prodhuk-prodhuk ekspor sing kasil nembus pasar global, Khofifah janji mbiyantu ngundhakake kuwalitase. (Antara)
Panulis : Antara
Edhitor : Tim Redhaksi Panjebar Semangat Digital
