Lomba Kampung Pancasila Surabaya 2026 Diwiwiti, 1.360 RW Nuju 200 Besar lan 35 Terbaik

Pemerintah Kota (Pemkot) Surabaya resmi ngluncurake Lomba Kampung Pancasila 2026 dina Kemis (17/9/2026) bengi. Kompetisi sing dieloni 1.360 RW ing 153 kelurahan kuwi dadi bagean saka upaya nguwatake gotong royong, kamandirian, lan kesejahteraan masyarakat.

Wali Kota Surabaya Eri Cahyadi dhawuh, Lomba Kampung Pancasila dadi momentum kanggo nguripake maneh nilai-nilai Pancasila ing kauripan sedina-dina. Miturut Pak Eri, gotong royong lan sikap padhadene sabiyantu mujudake kekuwatan sing perlu terus dijaga ing tengah masyarakat.

“Tujuane Lomba Kampung Pancasila kuwi bali meneh ngutamakake gotong royong kaya filosofine Pancasila. Aku ngajab kanthi bali marang Kampung Pancasila iki, mula gotong royong, padhadene tulung-tinulung lan njaga ditindakake ing Kota Surabaya,” ujare Wali Kota Eri sawise Launching Lomba Kampung Pancasila ing Balai Kota Surabaya, Kemis (17/9/2026) bengi.

Wali Kota Eri nganggep maneka masalah sosial ora bisa dirampungke mung dening Pemkot Surabaya. Cawe-vawene RT, RW, LPMK, nganti kabeh elemen masyarakat dadi bagean penting jroning mbangun kutha bebarengan.

“Surabaya maju dudu amarga wali kotane, nanging amarga wargane sing disengkuyung dening gotong-royong sing dadi ciri khas Pancasila. Sing bisa nggerakake kuwi RT, RW, LPMK lan kabeh warga Kota Surabaya,” ujare.

Lomba Kampung Pancasila nduweni patang pilar penilaian, yaiku lingkungan, kemasyarakatan, ekonomi, sarta sosial budaya. Kapapate pilar kuwi diajab ora mung dadi indikator ing kompetisi, nanging uga dicakake ing bebrayan saben kampung.

“Insyaallah yen kuwi mlaku, mula lingkungan uga bakal kajaga, ekonomi bakal mlaku, jiwa-jiwa sosial padhane tulung tinulung bakal obah. Amarga ora bisa ngrampungke masalah apa wae kuwi dirampungke (dhewekan) dening wali kota,” ujare.

Kanggo ndhukung program kuwi, Pemkot Surabaya uga mapanake Perangkat Daerah (PD) minangka pengampu kampung sing didampingi. Miturut Pak Eri, pamrentah ora cukup mung gawe kebijakan lan ngalokasi anggaran, nanging uga kudu ana lan menehi conto marang masyarakat.

“Dadi pamrentah kota kuwi kudu dadi bagean, dudu mung mrentah, nanging kepiye menehi conto. Amarga kuwi saben PD dadi pengampu,” ujare.

Para PD pengampu mengko tugase mesthekake patang pilar ing program Kampung Pancasila mlaku. Patang pilar kuwi wiwit saka kahanan lingkungan, gerakan ekonomi, kauripan sosial budaya, nganti gotong royong masyarakat.

“Mula pengampu kuwi bakal njaga kampunge. Bisa ora dheweke njaga lingkungane, (njaga) ekonomine gerak, (njaga) sosial budayane mlaku lan (njaga) gotong royonge mlaku,” tuture.

Pemkot Surabaya uga nyiapake evaluasi marang kinerja PD pengampu. Wali Kota Eri meling, PD sing ora bisa nindakake pendampingan bakal entuk tandha evaluasi arupa gendera ireng.

“Amarga pamrentah kuwi ora mung tugas gegandhengan anggaran lan liyane, nanging tugase mbalekake kepiye gotong royong, kepiye jiwa-jiwa Pancasila kuwi ditindakake, dudu mung diwaca nalika upacara, nanging ditindakake jroning urip sedina-dina,” tandhese.

Wali Kota Eri ngajab Lomba Kampung Pancasila ngasilake owah-owahan nyata ing saben wilayah. Owah-owahan kuwi nyakup aspek keamanan, lingkungan sing ramah marang bocah lan wanita, nganti peningkatan kesejahteraan masyarakat.

“Aku ngajab output lan outcome saka lomba Kampung Pancasila iki yaiku owah-owahan kampung sing aman, kampung sing ora ana maling motor, kampung sing bisa ramah bocah lan wanita, kampung sing sejahtera,” tuture.

Pak Eri optimistis semangat ksb bisa tuwuh amarga selaras karo karakter masyarakat Surabaya sing nduweni budaya arek lan semangat gotong royong.

“Insyaallah aku yakin kuwi bisa mawujud kanthi kampung Pancasila. Amarga sejatine Surabaya nduweni budaya arek sing pancen padhadene tetulung lan padhadene gotong royong,” pangajabe.

Ketua Satuan Tugas (Satgas) Kampung Pancasila tingkat kutha sekaligus Kepala Badan Penanggulangan Bencana Daerah (BPBD) Kota Surabaya, Irvan Widyanto ngandhakake, patang pilar dadi basis utama penilaian Lomba Kampung Pancasila.

“Lomba Kampung Pancasila basis penilaiane ing patang pilar. Kapisan gegandhengan karo pilar lingkungan, pilar kemasyarakatan, pilar ekonomi, lan pilar sosial budaya,” kandhane Irvan.

Ing pilar lingkungan, salah siji indikator sing dibiji yaiku pengurangan sampah liwat pemilahan sacara mandiri wiwit saka sumbere. Saben rumah tangga diajab nindakake pemilahan sampah ing tingkat RT utawa RW.

Sabanjure pilar kemasyarakatan nyakup penguatan keamanan lingkungan. Indikatore ing antarane pengaturan jadwal keamanan, anane CCTV, nganti upaya mawujude kampung bebas pencurian kendaraan bermotor.

Dene pilar ekonomi diarahake marang kemampuan warga mbangun kepedulian sekaligus kamandirian ekonomi. Salah sijine liwat identifikasi donatur utawa donasi kanggo mbantu ngrampungke masalah sosial ing lingkungan.

Miturut Irvan, kepedulian kuwi diwujudake kanthi ngajak warga sing mampu mbantu warga liyane sing butuh. Grengsenge pelaku usaha mikro, cilik, lan menengah (UMKM) uga dadi bagean saka pambiji.

“Tegese, ing level RT lan RW kepiye warga sing mampu bisa mbantu warga sing kurang mampu. Kuwi filosofine,” tandhese.

Dene pilar sosial budaya nyakup maneka aspek kualitas urip masyarakat, wiwit saka kesehatan, pendidikan, nganti kawigaten marang bocah putus sekolah.

Irvan njlentrehake, Lomba Kampung Pancasila lumaku wiwit September nganti Desember 2026. Tahapane dumadi saka sosialisasi lan technical meeting, peluncuran, pendaftaran online, seleksi administrasi, nganti verifikasi lapangan.

“Dadi ing tahapan kuwi ana launching, pendaftaran sacara online lan seleksi administrasi,” terange Irvan.

Luwih rinci, Irvan njlentrehake yen seleksi administrasi salah sijine nggepok marang data ing aplikasi Sayang Warga. Para Ketua RT lan Ketua RW sasuwene iki nindakake self assessment saben sasi liwat aplikasi kuwi. Asil self assessment ngasilake scoring sing dadi salah siji dhasar penilaian.

“Saka proses penilaian diterusake liwat verifikasi lapangan. Nah, verifikasi lapangan iki langsung ditindakake dening tim juri saka perangkat daerah pamrentah kota, akademisi, media, lan praktisi,” tuture Irvan.

Sawise peluncuran Lomba Kampung Pancasila tanggal 17 September, tahapan diterusake Rapat Tim Juri Verifikasi Lapangan Tahap I ing 23 September 2026. Verifikasi lapangan tahap pisanan lumaku tanggal 24-30 September 2026.

Asil verifikasi banjur dibahas ing Rapat Penentuan 500 Besar RW tanggal 2 Oktober 2026. 500 RW sing lolos bakal diumumake ing 5 Oktober 2026 amrih nerusake menyang tahap sabanjure.

Proses sateruse liwat Rapat Tim Juri Verifikasi Lapangan Tahap II ing 19-20 Oktober 2026. Verifikasi lapangan tahap loro sekaligus rapat penentuan 200 RW dianakake ing 8-19 November 2026.

200 RW sing lolos banjur diumumake tanggal 20 November 2026. Saka jumlah kuwi, cacah 35 RW bakal diseleksi meneh kanggo mlebu jajaran paling apik, dene 165 RW liyane entuk bantuan Rp10 yutanan.

Irvan nambahake, penilaian 200 RW uga nggatekake klasifikasi adhedhasar karakteristik wilayah. Kajaba kuwi, patang pilar tetep dadi dhasar penilaian kanthi bobot beda. Pilar lingkungan lan ekonomi nduweni bobot 35 persen. Dene pilar kemasyarakatan lan sosial budaya nduweni bobot 15 persen.

“Kabeh pilar tetep padhadene mengaruhi, nanging penilaian sing paling gedhe mengko asale saka pilar lingkungan lan pilar ekonomi,” tuture Irvan.

Sauntara kuwi Kepala Dinas Komunikasi lan Informatika (Diskominfo) Surabaya, Eddy Christijanto ngandhakake, program Kampung Pancasila mangkat saka nilai-nilai sing wis tuwuh ing kauripan masyarakat Surabaya.

“Satemene kauripan masyarakat ing Surabaya kuwi nilai-nilai Pancasila wis ngrasuk. Iki kita arep nggrengsengake meneh ing wujud sistem supaya masyarakat bisa ndeleng nilai-nilai Pancasila ing Surabaya kuwi pangecake kaya ngene,” kandhane Eddy.

Miturut Eddy, kasile program Kampung Pancasila ora mung dideleng saka penghargaan sing diwenehake, nanging dampake kanggo masyarakat.

“Sing penting kita pengin program kuwi kabeh dampake marang masyarakat, maju bareng, sejahtera bareng, sehat bareng,” ujare.

Saka 200 RW sing lolos, cacah 35 RW bakal rebutan hadiah adhedhasar klasifikasi cacahe RT. RW kanthi cacah RT kurang saka pitu bakal entuk hadiah juara pertama Rp25 yuta, juara loro Rp20 yuta, lan juara telu Rp15 yuta.

Dene RW kanthi cacah RT pitu utawa luwih bakal rebutan hadiah juara siji Rp30 yuta, juara loro Rp25 yuta, lan juara telu Rp20 yuta.

“Dadi saka 200 besar kuwi mengko dijupuk 35 besar. Nah, 35 besar kuwi mengko klasifikasine RW iku ana sing cacah RT-ne 7 utawa luwih, ana sing RW cacah RT-ne kurang saka 7,” jlentrehe.

Dene 165 RW liyane saka 200 besar saben RW bakal entuk bantuan gedhene Rp10 yuta. “Dadi saka 200 RW isih ana 35 RW. Nah, yen wis mlebu 200 besar saben (165 RW) bakal entuk bantuan Rp10 yuta,” ujare Eddy.

Sawise pengumuman 200 RW ing 20 November 2026, rangkaian lomba dibacutake liwat roadshow ing patang titik tgl 22 November, 28 November, 29 November, lan 5 Desember 2026. Rangkaian Lomba Kampung Pancasila 2026 sabanjure ditutup kanthi agenda awarding tgl 11 utawa 12 Desember 2026.

Eddy ngajab, Kampung Pancasila dadi gerakan berkelanjutan lan ora mandheg sawise kompetisi rampung.

“Program Kampung Pancasila Insyaallah bakal terus ana sapa wae wali kotane, sapa wae pejabate. Amarga iki demi kabecikan kabeh warga Surabaya,” pamungkase. (ADV)