Kutha Surabaya resmi ngluncuraké program medical tourism utawa wisata medis minangka alternatif layanan kesehatan sing terintegrasi kanggo masyarakat Indonesia tanpa kudu berobat menyang luar negeri. Program iki nyedhiyani paket layanan komprehensif sing kalebu konsultasi, mapag ing bandara, tindakan medis kaya medical check-up (MCU) utawa operasi, nganti wisata pemulihan.
Peluncuran medical tourism ksb dadi bagean saka rangkaian Hari Jadi Kutha Surabaya (HJKS) kaping-733 sing dianakaké ing Pelataran Balai Kota Surabaya, Selasa (21/4/2026). Program iki nggabungaké wolung rumah sakit ing Kutha Pahlawan sing wis duwé sertifikasi saka Kementerian Kesehatan (Kemenkes) RI.
Walikota Surabaya, Eri Cahyadi, nelakake yen medical tourism dadi langkah strategis kanggo nguwataké posisi Surabaya minangka kutha tujuan layanan kesehatan. Pak Eri nandhesake fasilitas medis ing Surabaya wis bisa nampung maneka jinis pengobatan sing sasuwene iki akeh digoleki masyarakat ing luar negeri.
“Alhamdulillah medical tourism ing Surabaya dilaunching. Ana rumah sakit wolu sing wis entuk sertifikasi saka Kementerian Kesehatan,” jelase Walikota Eri.
Eri Cahyadi nerangaké, konsep medical tourism ing Surabaya ora mung fokus ing layanan kesehatan, nanging uga nggathuk karo sektor pariwisata liwat kolaborasi karo biro perjalanan. Skema iki nggampangake pasien entuk layanan wiwit saka jemputan ing bandara, perawatan ing rumah sakit, nganti akomodasi hotel jroning sawijining paket layanan terpadu.
“Kita uga kolaborasi karo biro perjalanan wisata. Dadi yen wong pengin berobat ing medical tourism Surabaya, mung kari milih, banjur dijèmput saka bandara nuju rumah sakit,” kandhané.
Miturut Pak Eri, anane sawenehing rumah sakit gedhé ing Surabaya nuduhaké yen kutha iki bisa nyediyakaké layanan medis sing selaras karo luar negeri. Mula, Pak Eri optimis program medical tourism bakal ningkatké kapitayan masyarakat kanggo berobat ing dalem negeri.
“Surabaya iki bakal dadi bagean kutha kanggo layanan kesehatan. Iki bakal kita masifaké promosiné ing ngendi wae,” tambahé.
Luwih akeh, Walikota Eri njlentrehake yen saben rumah sakit duwéni layanan unggulan sing béda-béda, wiwit jantung, terapi, nganti layanan kesehatan anak. Mengkone, Pak Eri ngajap luwih akeh maneh rumah sakit ing Surabaya sing oleh sertifikasi sing padha supaya pilihan layanane tambah akeh.
“Wolung rumah sakit iki duwé layanan unggulané dhewe-dhewe. Ana jantung, ana sing gegayutan karo terapi, ana sing gegayutan karo anak, dadi unggulané beda-beda,” jlnetrehe.
Malah, Ketua Dewan Pengurus Asosiasi Pemerintah Kutha Seluruh Indonesia (APEKSI) iki uga mbeberake sawetara rumah sakit ing Surabaya wis nglayani pasien saka luar negeri. Kanggone Pak Eri, iki nuduhaké tingkat kepercayaan internasional marang kualitas layanan kesehatan ing Kutha Pahlawan.
“Yen kita deleng dokter-dokteré ing Surabaya uga luar biasa. Muga-muga iki bisa menehi kepercayaan marang warga Indonesia, ora menyang luar negeri nanging cukup teka ing Indonesia utamané ing Kutha Surabaya,” ujare.
Gegayutan kabutuhan tenaga medis, utamané dokter spesialis, Walikota Eri njamin wolung rumah sakit iki wis nyocogaké standar sing disyaratake Kemenkes kanggo mlebu program medical tourism.
“Yen wis mlebu medical tourism, kabutuhan rumah sakit marang dokter spesialisé mesthi wis ana. Amarga yen dokter spesialisé ora ana, ora mungkin entuk sertifikat medical tourism,” tuture.
Walikota Eri uga nargetaké jumlah pasien medical tourism bisa nggayuh 500 nganti 1.000 wong ing sawetara wulan kapisan. Target iki dianggep realistis amarga dhuwure minat pasien saka Indonesia Timur nganti luar negeri sing teka menyang Kutha Surabaya.
“Dadi iki target sing ditentokake 500 nganti 1000 wong sing teka ing Kutha Surabaya, kita deleng ing sawetara wulan ngarep mengko,” ujare.
Kanggo ndhukung asil target iku, Pemerintah Kutha (Pemkot) Surabaya bakal nggrengsengake promosi liwat maneka moda transportasi. Kaya pesawat, sepur, nganti kapal laut, kanthi nuduhake kaunggulan layanan medis lan dokter spesialis ing saben rumah sakit.
“Kita bisa ndeleng wis akeh saka Indonesia Timur, saka internasional, saka luar negeri, sing teka nyang Surabaya. Mula, promosi iku kita genjot manèh kanthi kaluwihan lan kemampuan saka saben dokter lan layanan unggulan ing saben rumah sakit,” jelase.
Sauntara kuwi, Kepala Dinas Kesehatan (Dinkes) Kutha Surabaya, dr. Billy Daniel Messakh, nerangaké konsep medical tourism nggabungaké layanan kesehatan karo wisata ing sawijining paket rega. Pasien bakal oleh perawatan medis, dene kulawarga sing ndampingi bisa nenikmati fasilitas wisata.
“Prinsipé kan layanan karo wisata. Dadi garis besare sing lara kita rawat, kulawarga sing ora lara mungkin pengin menyang ngendi-endi kita uga bisa ngladeni,” ujare dr Billy.
dr Billy aweh conto, pasien saka Nusa Tenggara Timur (NTT) lan Papua. Pasien iki diladeni wiwit njemput ing Bandara Juanda nggunakaké ambulans nganti opname ing rumah sakit nganti waras.
“Wiwit mabur saka kana, dipapag ing Juanda nganggo ambulans kita. Saka kono langsung digawa menyang rumah sakit nganti waras lagi mulih maneh dheweke,” tambahe dr Billy.
Gegayutan biaya, Billy njelasake yen layanan medical tourism ing Surabaya luwih murah dibandhingaké negara liyané kaya Malaysia lan Singapura. Amarga biaya iku adhedhasar regulasi Peraturan Daerah (Perda) Kutha Surabaya. “Yen dibandhingaké karo Malaysia utawa Singapura, kita luwih murah adoh,” kandhané.
Dèwèké ngira-ira biaya layanan ing rumah sakit Surabaya mung kira-kira 75 persen dibandhingaké berobat ing Malaysia utawa Singapura. “Perbandingané yen nang kana 100 persen, ing kéné mungkin mung 75 persen. Dadi bisa ngirit kira-kira 25 persen,” jlentrehe.
Dene wolung rumah sakit sing mlebu program medical tourism Surabaya iki yaiku RSUD Dr. Mohamad Soewandhie, Rumah Sakit Husada Utama, Rumah Sakit Ubaya, Rumah Sakit Premier Surabaya, RSUD Dr. Soetomo, Rumah Sakit Katolik St. Vincentius a Paulo (RKZ) Surabaya, Rumah Sakit Universitas Airlangga (RS UNAIR), lan Rumah Sakit Siloam.
Saben rumah sakit iki nawakaké maneka layanan unggulan. Kaya onkologi, ganti sendi lutut (Total Knee Replacement), bayi tabung, hemodialisa, radiologi, bedah saraf, imunoterapi, bedah jantung, rekonstruksi kraniofasial, nganti layanan pengobatan tradisional lan komplementer. (ADV)
