Presiden Prabowo: Awake Dhewe ing Jalur sing Bener

Presiden Prabowo Subianto nemenake, sajrone rong taun iki pemerintahan kang dipimpin wis mlaku ana jalur sing bener jroning ngleksanani program-program strategis nasional. Miturut Prabowo, sawernane program strategis, wiwit saka swasembada pangan, nguwatake posisine Danantara, nganti panerapane ekspor “satu pintu” mujudake upaya kanggo nylametake dina tembene bangsa Indonesia.

“Akeh kesuksesan kang wis kita gayuh. Dakjaluk aja mindher maneh. Awake dhewe we are on the righ track,” tuture Presiden Prabowo, Jumuah, 23 Oktober 2026.

Presiden uga nemenake wigatine makan bergizi gratis (MBG) minangka investasi strategis generasi bangsa ing dina mburi. Mula kanggo mesthekake amrih cak-cakane MBG ora disalahgunakake, Prabowo ngandharake menawa pemerintah wis mbeciki tata laksanane. Kabukten wong 13 ditetepake minangka tersangka dening Kejaksaan Agung, 203 dipriksa penyidik, 353 dipecat, lan 2.600 lagi dipriksa dening Inspektorat Badan Gizi Nasional (BGN).

Prabowo mundhut jajarane amrih tumindak tegas marang penyimpangan-penyimpangan. “Aja tidha-tidha. Pecat, resikana nganti bener-bener resik! Jalaran MBG iki penting lan strategis tumrap dina tembene anak-anak kita,” ngendikane presiden.

Ing sektor ekonomi kerakyatan, Presiden Prabowo ngacungi jempol marang 10.000 Koperasi Desa/Kelurahan Merah Putih kang wis operasional. Sauntara iku ing babagan pembangunan infrastruktur dhasar, Prabowo ngandharake lamun pemerintah wis ngleksanani program “bedah rumah” 440.000 unit sarta ngrenovasi 90.000 sekolahan.

Ing babagan konektivitas (nyambungake) wilayah, Presiden Prabowo ngendikakake pemerintah mbangun ora kurang 5.000 jembatan (kreteg). Pemerintah uga terus mikuwati layanan kesehatan lumantar pembangunan rumah sakit ing dhaerah-dhaerah. Saka 66 rumah sakit sing dianggarake, ngendikane presiden, 22 ing antarane wis rampung dibangun.

Pembangunan mal pelayanan publik terus digiyatake, mligine kanggo ngundhakake mutu layanan sarta nyalurake bantuan-bantuan sosial pemerintah. Presiden nelakake panuwune marang para menteri/wakil menteri kang kompak mbiyantu panjenengane nyambut gawe. Kejaba iku presiden uga paring apresiasi marang para anggota Dewan Pertimbangan Presiden (Wantimpres) kang nduweni semangat nyawiji. Mungguhe presiden, kekompangan (solidhitas) pemerintah mujudake modhak penting jrone ngadhepi sawernane tantangan pembangunan.

Kesuksesan kang wis digayuh mau, ngendikane Presiden Prabowo, kudu dadi penyemangat kanggo mbeciki kekurangan. Satemah program-program prioritas mau sangsaya cepet dileksanani. “Gaweyan kita akeh, tantangan akeh, kekurangan uga isih akeh. Ayo bebarengan kita atasi. Nyambut gawe bebarengan. We have to work as a team,” tuture Presiden Prabowo.

Rekor Beras 4,56 Juta Ton

Sauntara iku Menteri Pertanian Andi Amran Sulaiman ngandharake jrone Sidang Kabinet Paripurna ana Istana Merdeka, Rebo, 21 Oktober 2026, ing wektu rong taun kepemimpinane Presiden Prabowo,  pemerintah kasil nyithak rekor cadhangan beras nasional paling dhuwur sadawane sejarah, yaiku 4,56 juta ton. Kepara ing sasi Oktober 2026, stok beras mau wis nggayuh 5,7 juta ton.

Kanthi cadhangan beras nasional semono akehe mau, Amran mesthekake menawa ketahanan pangan Indonesia aman banget nganti Juli 2027. Surplus pangan mau isih disengkuyung dening cadhangan saka maneka komodhitas sarta potensi panen pari 10.000 ton. Ing sisih liya, pemerintah liwat Kementerian Pertanian terus mbudidaya ngundhakake karaharjane petani lumantar ngudhunake rega rabuk 20 persen lan ngundhakake Harga Pembelian Pemerintah (HPP) gabah.

“HPP rega gabah beras mundhak, samengko NTP-ne nilai tukar petani 131. Iki sing paling dhuwur saploke 92, mbokmenawa malah saploke Indonesia mardika,” ujare Amran.

Pemerintah, kandhane Amran, isih keconggah menehi pangan senajan mengkone gunggunge pendhudhuk Indonesia nganti 500.000 utawa setengah miliar. Samengko cacahe pendhudhuk Indonesia wis meh 300.000. Carane nyukupi bahan pangane yakuwi bebarengan karo Kementerian Pertahanan lan TNI darbe rancangan njembarake lahan mineral 2 juta hektare, diwiwiti nggarap 500 ewu hektare satahap mbaka satahap.

Amran nuturake Kementerian Pertanian bakal mbrastha sawernane bentuk lan modhus penyimpangan pangan, klebu nlusuri praktik ora wajar beras premium fortifikasi kang regane Rp 56.000 sekilo. Amran kepengin mawujudake keadilan pangan tumrap kabeh rakyat Indonesia.

Menteri Koordinator Bidang Perekonomian Airlangga Hartarto nerangake mratelakake, ekonomi Indonesia tuwuh 5,45 persen. Ngrembakane perekonomian, ujare Airlangga, akeh disangga dening investasi sarta sektor prodhuktif. Lelorone dadi fokuse pemerintah njurung ngrembakane ekonomi sing inklusif lan terus-terusan.  Miturut Airlangga, pertumbuhan ekonomi Indonesia 5,45 persen mau dadi kang paling dhuwur ing ASEAN.

Kanggo njaga pertumbuhan ekonomi, pemerintah nerapake dhisiplin fiskal lan stabilitas sistem keuangan kanggo nyengkuyung keberlanjutan sistem ekonomi. Dhefisit APBN 1,24 persen, kandhane Airlangga, isih selaras karo arah kang dirancang.

ANTARA