Ngundhuh Pigunane Tomat

Tomat, sapa ta sing ora ngerti. Mbokmenawa meh kabeh pawongan kerep mrangguli lan uga ngrahabi ing padinane. Ajaa kok uwong diwasa, bayi umur nem sasi nalika wiwit memangan wae kerep diprayogakake maem sari tomat. Pancen, tomat gampang olahane. Bisa digawe jus, saos, sambel, acar. Malah uga bisa dinikmati ngono wae, kanggo lalapan utawa nyamikan.

Umume tomat kang ana ing pasaran wujude saemper bal cilik, rasane legi semu kecut lan seger. Mula ya bisa kanggo nyegerake telak, nyuda rasa ngelak. Kejaba saka iku, sejatine tomat uga bisa kanggo antiseptik usus, pencahar (ngusadani bebelen), ngundhakake nepsu maem, ngrangsang enzim lambung lan nggancarake aliran empedhu menyang usus. Malah uga ana panaliten nuduhake yen priya kang ajeg dhahar tomat kang dimangsak, bisa nyuda risiko kanker prostat nganti 45%.

Panaliten bab tomat kawiwitan dening Dr. John Cook Bennet saka Wiloughby University, Ohio, AS, nalika November 1834. Asile panaliten banjur ditulis dening Hubert Howe Bancroft ing History of Utah. Bennet nliti pigunane tomat, kang mligine bab mupangate kanggo ngatasi gangguwan pencernaan. Yaiku ngusadani mencret, serangan empedhu lan fungsi lever. Saka panaliten iki banjur akeh uwong kang nyebut tomat kanthi aran ”apel hati”, jalaran bisa ngusadani lara ing lever/ati (dudu lara ati amarga pedhot katresnan ditinggal rabi lho ya).

Peneliti saka Rowett Research Institute ing Aberdeen, Skotlandia, nemokake bab anyar. Gel (jel) werna kuning kang ngupengi wiji tomat, bisa nyegah penggumpalan lan pembekuan getih, pemicu stroke lan serangan jantung. Lelorone panaliten iki banjur diterusake dening dr. Yumi Tohuoka, peneliti saka Tohoku University ing Sendai, Jepang.

Mupangate Tomat

1. Antioksidan : Tomat ngandhut vitamin A dan C, sarta beta carotene sing dhuwur. Tetelune piguna minangka antioksidan aktif kang bisa netralake radikal bebas. Zat radikal bebas ing getih bisa dibuwang nganggo Lycopene dhuwur, kang ana ing tomat. Bebayane radikal bebas, rak ya para maos wis padha ngerti. Mula, ora ana salahe, yen makarya, sangu dhaharan saka ngomah kang ana irisane tomatseger.
2. Mripat awas : Vitamin A lan beta carotane gedhe pigunane kanggo njaga kasarasane mripat. Mula, ajeg memangan tomat uga bisa ngrerendhet rabun senja.
3. Nyegah Kanker : Tansaya akeh panaliten kang nuduhake yen Lycopene ing tomat bisa nyuda risiko kanker prostat, uga kanker kolorektal (usus besar). Panaliten paling gres, tomat kang dimangsak bakale ngasilake Lycopene luwih dhuwur, tinimbang tomat mentah. Mula, mangga padha sregep dhahar sop tomat!
4. Nguwatake Jantung : Tomat ngandhut Kalium lan Vitamin B kang bisa nyuda kolesterol lan tekanan dharah. Mula bisa nyegah stroke lan gangguwan jantung.
5. Kulit Mulus : Lycopene pranyata uga bisa kanggo srana ngrumat kulit lho! Tomat diklethek alon-alon, banjur perangan njerone kulit iki ditemplekake pipi lan bathuk. Dinengake udakara 10 menit, banjur dibilas nganggo banyu resik. Bisa ditindakake ajeg seminggu pindho. Asile? Kulit krasa resik, seger, lan luwih alus.
6. Rambut Sehat :Kaya kang kapratelakake ing ndhuwut, vitamin A ing tomat klebu dhuwur. Kejaba piguna kanggo njaga kasarasan mripat, vitamin A uga migunani kanggo njaga tuwuhe rambut tansaya sehat.
7. Balung Kuwat :Tomat uga ngandhut Vitamin K lan Kalsium kang cukup kanggo njaga amrih balung tansah pengkuh lan kuwat.