Nadyan wancine isih kepara esuk, nanging ing terase pendhapa bale Desa Cerep, Kecamatan Kedawung, Kabupaten Sragen, Jawa Tengah, sawatara wanita kadher Tim Pendamping Keluarga (TPK) Keluarga Berencana utawa KB wis samapta ngleksanani tugas, Kemis, April 2026. Sepedha motore padha dipasangi bronjong. Kaya dina-dina sing uwis, esuk kuwi ibu-ibu mau nglumpuk saperlu ngenteni tekane mobil Satuan Pelayanan Pemenuhan Gizi (SPPG) kanggo nyalurake program Makanan Bergizi Gratis (MBG) mligi ibu nggarbini lan nyusoni.
Ing Kecamatan Kedawung ana kadher TPK KB cacah 49 kang wiwit Januari 2026 nganti saiki ditugasi ngedumake MBG marang ibu hamil (bumil) lan ibu menyusui (busui). Kanthi madhahi MBG ana njero bronjong, ibu-ibu mau kanthi semangat mubeng menyang desa ngadesa saperlu menehake paket panganan bergizi marang sasaran. Pangedume MBG marang bumil lan busui mujudake upayane pamarentah nyegah bocah stunting krana asupan gizine kurang.
(Foto: Antara/Mohammad Ayudha).
