Rasa Getun Sawise Getun

KITA kabeh sawijining dina mengko mesthi bakal mati. Donya iki mung sauntara, ora langgeng, bakal rusak lan musna. Donya mung ampiran nuju papan kang luwih langgeng kang arane akerat.

Menungsa akhir jaman, kaya kita iki, akeh sing luwih tresna marang donya sarta wedi mati. Uga akeh kang durung ngrumangsani apadene nggawe persiapan sadurunge mati. Salah siji sebabe yakuwi merga gebyare urip ing donya iki kang gawe kerep lena.

Nalika kita mati, roh kita metu saka tutuk lan grana kita. Mripat mujudake pancaindera pungkasan kang ndeleng metune roh mau. Mula iku wong kang mati, mripate kerep katon mbukak amba.

Kabeh kita bakal marak sowan ing ngarsane Gusti Allah lan mlebu ing alam kubur.

Wong kang bebarengan kita ing donya bakal enggal nglalekake kita, dene kita bakal nampa walesan saka tumindak kang wis kita tindakake nalika ing ndonya kanggo ngadhep ing ngarsane Gusti Allah.

Urip ing donya tujuane dudu kanggo mati, nanging persiapan kanggo nglakoni mati. Allah nyipakake menungsa lan jin ora liya mung kanggo ngibadah marang
Panjenengane.

Wong kang wis mati bakal nemahi rasa getun engga ngaru ara nyenyuwun marang Gusti Allah amrih diuripake maneh amarga pengin ningkatake amalane.

Ing ngisor iki mujudake 5 rasa getun kita sawise mati mengko. Apa wae kuwi? Iki ing antarane.

1. Getun Merga Ora Sedhekah Maksud sedhekah ing kene manut dhawuhe Rasulullah marang sahabate yakuwi tumindak kang becik. Dudu mung perkara sedhekah dana driyah jroning wujud dhuwit wae, nanging amalan kang becik kang ditindakake tumrap sepepadha menungsa lan makhluk nalika urip ing donya uga kinaran sedhekah. Contone kaya upamane nresnani kewan, mbiyantu sedulur kang kesusahan, ngomong kang becik marang wong tuwa, mepaki janji. lsp.
2. Getun Merga Ora Gelem Nampa Pitutur Nulak ing batine utawa kanthi terang-terangan wong kang nuturi bab kabecikan bisa nuwuhake rasa getun kang tanpa upama.

Gusti Allah njlentrehake jroning Surat Al Mulk ayat 6 – 11 kang terjemahan bebase kurang luwih muni mangkene; “Nalika menungsa diuncalake menyang neraka amarga nampa azab Jahannam, dheweke krungu suarane neraka kang nggegirisi banget. Saben wong kafir bakal diuncalake, tukang jaga neraka banjur takon apa ora ana sing ngelikake sira nalika urip ing donya. Wong-wong sing ngenggoni neraka kuwi mangsuli, satemene wis teka sawijining pawongan kang menehi pepenget nanging wong-wong padha nyelaki. Mula wong-wong iku rumangsa getun lan ngakoni dosa-dosane.”

3. Getun Merga Ora Nindakake Sholat Kita ora bisa nyuwun mati amrih luwih cepet utawa uga nyuwun amrih ngolor-olor pati kita. Nalika menungsa kuwi umbar-umbaran uripe, mula dheweke rugi gedhe nalikane ngadhepi patine. Mangka satemene Gusti Allah wis paring pangayoman marang 7 golongan menungsa, salah sijine yakuwi nom-noman kang nalika uripe digunakake kanggo taat marang Gusti Allah.

4. Getun Merga Mateni Obor Kang dikarepake mateni obor ing kene yakuwi medhot paseduluran utawa silaturahmi. Wong kang medhot silaturahim klawan kancane utawa sedulure, saban jure nemahi pati, mula dheweke bakal nandhang tuna. Amarga Rasulullah salallahu alaihi wasalam wis ngelikake kita amrih ora medhot sesambungan memitran utawa paseduluran, padhadene benci, lan pasulayan sapepadha menungsa.

5. Getun Merga Ora Tau Dakwah. Dakwah yakuwi pangajak utawa ajak-ajak marang kabecikan tumrap wong liya. Dakwah ora mesthi kudu ngadeg ing sandhuwure mimbar, dideleng wong akeh, utawa ceramah ing mesjid-mesjid. Nanging dakwah kuwi satemene kuwajibane saben wong Muslim. Bisa ditindakake dening sawijining pawongan marang sisihane utawa anak-anake, mitra kanca ing sekolahane, kanca dolanan, kepara yen perlu dening anak marang wong tuwane yen pancen wong tuwa mau tumindake slenca saka tuntunane Gusti Allah.

Mangkono kuwi 5 rasa getun kang beakal dialami menungsa sawise mati.

Sauntara kuwi apa 5 rasa getun nalikane kita urip?

5 rasa getun nalikane urip yakuwi yen kita ora bisa nindakak 5 wektu solat fardhu saben dinane. Wallahua’lam bisawab.

***

Panulis: Ki Jenggot